متحده قومي موومينٽ جي جدوجهد جو مقصد اقتدار جي طاقت کي عام پاڪستاني جي دروازي تائين پهچائڻ آهي. ايم ڪيو ايم رابطا ڪميٽي ميمبر عبدالحسيب.
ميرپورخاص ۾ ڪارنر ميٽنگ کي خطاب.
ميرپورخاص: 17 نومبر 2015
ايم ڪيو ايم جي رابطا ڪميٽي جي ميمبر عبدالحسيب چيو آهي ته ايم ڪيو ايم جي جدوجهد جو مقصد اقتدار جي طاقت کي عام پاڪستاني جي دروازي تائين پهچائڻ آهي، انهن خيالن جو اظهار انهن ميرپورخاص ۾ سيڪٽر اي جي وارڊ نمبرن 9 ۽ 11 ۾ خطاب ڪندي ڪيو. ان موقعي تي ميرپورخاص زونل انچارج مجيب الحق ۽ ٻيا به موجود هئا. عبدالحسيب چيو ته قيام پاڪستان کان وٺي ڪري اڄ تائين ٻه سيڪڙو مراعات يافته طبقي لٽ مار جو بازار گرم ڪري رکيو آهي ۽ انهن وطن جي سمورن ادارن کي تباھ ڪري ڇڏيو آهي ۽ اهي قومي اثاثن کي به وڪڻي رهيا آهن ۽ غير ملڪي قرضن جي نالي تي هر پاڪستاني شهري تي قرض جو پهاڙ رکي ڇڏيو آهي. انهن چيو ته اهي لٽ مار ڪندڙ عناصر پاڪستانين کي ڪڏهن مذهب جي نالي تي، ڪڏهن لسانيت جي نالي تي ته ڪڏهن فرقي واريت جي نالي تي ويڙهائڻ جي سازشن ۾ رڌل آهن.انهن عوام کي اپيل ڪئي ته اهي حق پرست نمائندن کي وڏي تعداد ۾ ووٽ ڏيئي ڪري ڪامياب بڻائين. ان موقعي تي ٻين به خطاب ڪيو.
*****