ڪنهن به جماعت جي لاءِ ايم ڪيو ايم جهڙي عوامي تحريڪ سان ڀيٽ ڪرڻ وڏي فخر جي ڳالھھ آهي.ايم ڪيو ايم رابطا ڪميٽي ميمبر گلفراز خان خٽڪ.

ڪراچي: 29 آڪٽوبر 2015 

                     متحده قومي موومينٽ جي رابطا ڪميٽي  جي ميمبر گلفراز خان خٽڪ ايم ڪيو ايم جي حوالي سان عمران خان ۽ تحريڪ انصاف جي ٻين رهنمائن جي بيانن تي تبصرو ڪندي چيو آهي ته ڪنهن به جماعت جي لاءِ ايم ڪيو ايم جهڙي عوامي تحريڪ سان ڀيٽ ڪرڻ ان جماعت جي لاءِ وڏي فخر جي ڳالھھ آهي. پنهنجي هڪ بيان ۾  گلفراز خان خٽڪ چيو ته ايم ڪيو ايم ڪروڙين عوام جي نمائنده جماعت آهي جنهن کي عوام بار بار مينڊيٽ ڏيئي ڪري پنهنجي نمائندگي جو حق ڏنو آهي ۽ ايم ڪيو ايم جهڙي عوامي تحريڪ جي ڪنهن به سياسي جماعت سان ڀيٽ ڪرڻ ان جماعت جي لاءِ وڏي فخر جي ڳالھھ آهي. انهن چيو ته اڄ تائين ڪنهن به سياسي جماعت جي ڀيٽ تحريڪ انصاف سان نه ڪئي وئي آهي.ڪنهن به سياسي جماعت جي تحريڪ انصاف سان ڀيٽ ڪرڻ ان جماعت جي لاءِ وڏي شرم جي ڳالھھ سمجهي وڃي ٿي. ڇو ته تحريڪ انصاف مير جعفر ۽ مير صادق جو روپ آهي. انهن چيو ته عمران خان نيازي ۽ پي ٽي آئي جا ٻيا رهنماء  اليڪشن ۾ جنهن به جماعت کان عبرتناڪ شڪست کائين ٿا ته ان جون برائيون شروع ڪرڻ لڳن ٿا. اهو ئي سبب آهي ته اهي اين اي 246 ۾ ايم ڪيو ايم ۽ اين اي 144 جي ننڍي چونڊ ۾ مسلم ليگ ن کان شڪست کائڻ کان پوءِ ايم ڪيو ايم ۽ مسلم ليگ ن جي خلاف بيان ڏيئي رهيا آهن. انهن چيو ته سڄي پاڪستان جا حق پرست عوام باشعور آهن ۽ انشاء الله تعالٰي آئنده مڪاني اليڪشن ۾ به اهي بيمار ذهنن تي ٻڌل تحريڪ انصاف جي ڪارن ڪرتوتن جو جمهوري انداز ۾ جواب ڏيندا.

*****