مظفر ڳڙھ ۾ پوليس اهلڪارن جي طرفان هڪ عورت جي لڄ لٽڻ جي واقعي تي ايم ڪيو ايم شعبه خواتين جي انچارج محترمه ڪشور زهرٰي جي طرفان مذمت جو اظهار.
ڪراچي: 14 آڪٽوبر 2015
متحده قومي موومينٽ شعبه خواتين جي انچارج ۽ ميمبر قومي اسيمبلي محترمه ڪشور زهرٰي مظفر ڳڙھ ۾ پوليس اهلڪارن جي طرفان هڪ عورت جي لڄ لٽڻ جي واقعي جي سخت ترين لفظن ۾ مذمت ڪئي آهي ۽ انصاف نه ملڻ تي عورت جي طرفان پاڻ کي ٿاڻي جي ٻاهران باھ ڏيڻ جي واقعي تي وڏي ڏک ۽ افسوس جو اظهار ڪيو آهي. پنهنجي هڪ بيان ۾ انهن چيو ته پنجاب ۾ عورتن جي لڄ لٽڻ جا واقعا ۽ انهن واقعن ۾ مظلوم عورتن کي انصاف نه ملڻ وڏو ظلم آهي. انهن چيو ته مظفر ڳڙھ ۾ پوليس اهلڪارن جي طرفان عورت جي لڄ لٽڻ جي واقعي کان پوءِ متاثره عورت جي طرفان پاڻ کي باھ ڏيڻ جو واقعو واضع ثبوت آهي ته پنجاب جون مظلوم عورتون بااثر ۽ طاقتور ماڻهن جي هوس جي ور چڙهي رهيون آهن ۽ عورتن جي حقن جي دعويدار پنجاب حڪومت به ان تي خاموش تماشائي بڻيل آهي جنهن جي جيتري به مذمت ڪئي وڃي اها گهٽ آهي. انهن وزير اعظم ميان نواز شريف ۽ وزير اعلٰي پنجاب ميان شهباز شريف کان مطالبو ڪيو ته اهي ان واقعي ۾ ملوث پوليس اهلڪارن کي سخت ترين سزا ڏيارين ۽ پنجاب ۾ عورتن جي تحفظ واري قانون تي سختي سان عمل ڪرائين.
*****