ايم ڪيو ايم بلديه ٽائون، ناظم آباد گلبهار سيڪٽر ۽ نارٿ ڪراچي سيڪٽر جي ڪارڪنن جي بغير ڪنهن جواز جي گرفتارين تي رابطا ڪميٽي جي طرفان مذمت جو اظهار.
ڪراچي: 22 سيپٽمبر 2015
متحده قومي موومينٽ جي رابطا ڪميٽي گذريل ڏينهن ڪراچي جي مختلف علائقن ۾ رينجر، ساده لباس ۾ ملبوس اهلڪارن ۽ سي آئي ڊي پوليس جي هٿان ايم ڪيو ايم جي ڪارڪنن جي بغير ڪنهن جواز جي گرفتارين جي سخت ترين لفظن ۾ مذمت ڪئي آهي. پنهنجي هڪ بيان ۾ رابطا ڪميٽي چيو ته بلديه ٽائون سيڪٽر يونٽ 112 اي جي ڪارڪن محمد اختر، ناظم آباد گلبهار سيڪٽر يونٽ 189 جي ڪارڪن سهيل ۽ نارٿ ڪراچي سيڪٽر يونٽ 133 سي جي ڪارڪن سيد محمد منير کي رينجر ۽ ساده لباس ۾ ملبوس اهلڪارن گرفتار ڪري ورتو آهي. رابطا ڪميٽي چيو ته ايم ڪيو ايم جي ڪارڪنن کي گرفتار ڪرڻ کان پوءِ انهن کي لاپتا ڪرڻ تي انهن جا گهر وارا سخت پريشان آهن ۽ انهن کي ان ڳالھ جو خطرو آهي ته ڪٿي ٻين ڪارڪنن وانگر انهن کي به ماورائي عدالت قتل نه ڪيو وڃي. رابطا ڪميٽي وڌيڪ چيو ته رينجر ۽ ٻيا قانون نافذ ڪرڻ وارا ادارا ايم ڪيو ايم جي ڪارڪنن جي گرفتارين تي پنهنجي توانائي کپائڻ جي بدران دهشت گردن، ڀتي خورن، اسٽريٽ ڪرائيم جي وارداتون ڪرڻ وارن ۽ گينگ وار جي ڏوهارين جي گرفتاري تي کپائين . رابطا ڪميٽي وزير اعظم ميان نواز شريف، وفاقي وزير داخلا چوڌري نثار علي خان، گورنر سنڌ ڊاڪٽر عشرت العباد، وزير اعلٰي سنڌ سيد قائم علي شاھ، صوبائي وزير داخلا انور سيال ۽ انساني حقن جي علمبردار قومي ۽ عالمي تنظيمن ۽ اين جي اوز کان مطالبو ڪيو ته اهي شهر ۾ ايم ڪيو ايم جي خلاف جاري غير اعلانيه آپريشن جو نوٽس وٺن ۽ غير قانوني ڇاپن جو سلسلو بند ڪرائين ۽ آئين جي مطابق گرفتار ٿيلن کي عدالت ۾ پيش ڪرائين.
*****