ڪراچي آپريشن جي حمايت ڪرڻ تي ايم ڪيو ايم جي چونڊيل نمائندن ۽ ڪارڪنن کي دهشت گرد نشانو بڻائي رهيا آهن. خواجه اظهار الحسن.

ڪراچي: 18 سيپٽمبر 2015 

              ڪراچي آپريشن ۾ پوليس، رينجر ۽ ٻين سيڪورٽي ادارن کي نشانو بڻائڻ وارا دهشت گرد ڪراچي آپريشن جي حمايت ڪرڻ تي ايم ڪيو ايم جي چونڊيل نمائندن ۽ ڪارڪنن کي به نشانو بڻائي رهيا آهن ۽ دهشت گردن کي ملڪ جي استحڪام جي لاءِ ايم ڪيو ايم جو ڪردار کٽڪي رهيو آهي. سنڌ اسيمبلي جي مستعفي ميمبر سيف الدين خالد جي گاڏي تي هٿيار بند دهشت گردن جي طرفان فائرنگ جو واقعو انتهائي افسوسناڪ آهي. انهن خيالن جو اظهار سنڌ اسيمبلي جي مستعفي ميمبر خواجه اظهار الحسن خورشيد بيگم سيڪريٽريٽ ۾ پريس ڪانفرنس ڪندي ڪيو. ان موقعي تي رابطا ڪميٽي جي ميمبرن اقبال مقدم،زاهد منصوري ۽ مستعفي ميمبرن کان علاوه  ٻيا به موجود هئا.  خواجه اظهار الحسن چيو ته ان کان اڳ به دهشت گردن ڪراچي ۾ ايم ڪيو ايم جي چونڊيل نمائندن منظر امام، رضا حيدر، ساجد قريشي ۽ انهن جي نوجوان پٽ کي شهيد ڪري ڇڏيو هو، جڏهن ته مستعفي حق پرست ميمبر رشيد گوڏيل کي به گذريل مهيني دهشت گردن فائرنگ جو نشانو بڻايو هو. جنهن ۾ اهي سخت زخمي ٿي پيا هئا. جيڪا وڏي ڳڻتي جي ڳالھ آهي.انهن چيو ته هڪ طرف ته ڪراچي آپريشن ۾ ايم 

ڪيو ايم کي تڪراري بڻايو پيو وڃي. جڏهن ته ٻئي طرف دهشت گرد اسان جي اڳواڻڻ ۽ ڪارڪنن کي کلي عام نشانو بڻائي رهيا آهن. پر وفاقي ۽ صوبائي حڪومتون اسان جي اڳواڻڻ ۽ ڪارڪنن جي زندگين کي ڪائي به اهميت نه ڏيئي رهيون آهن. انهن چيو ته رشيد گوڏيل جي قاتلن کي به هن مهل تائين گرفتار نه ڪيو ويو آهي جڏهن ته سيف الدين خالد تي حملي کان پوءِ سنڌ حڪومت جي ڪنهن به نمائندي سيف الدين خالد يا ايم ڪيو ايم جي ڪنهن به اڳواڻ سان رابطو نه ڪيو آهي ۽ نه ئي اسان جي چونڊيل نمائندن کي سنڌ حڪومت جي طرفان سيڪيورٽي فراهم ڪئي وئي آهي. انهن وزير اعظم ميان نواز شريف ۽ وزير اعلٰي سنڌ سيد قائم علي شاھ کان مطالبو ڪيو ته اهي ايم ڪيو ايم جي چونڊيل نمائندن کي فوري طور تي سيڪيورٽي فراهم ڪن. ان موقعي تي سيف الدين خالد به صحافين کي ان افسوسناڪ واقعي جي تفصيلات کان آگاھ ڪيو.

*****