منظور وساڻ کي نفسياتي علاج جي سخت ضرورت آهي. حق پرست ميمبر سنڌ اسيمبلي محمد حسين.
ڪراچي: 10 آگسٽ 2015
متحده قومي موومينٽ جي ميمبر سنڌ اسيمبلي محمد حسين چيو آهي ته صوبائي وزير منظور وساڻ نفسياتي مرض جو شڪار آهن ۽ انهن کي نفسياتي علاج جي سخت ضرورت آهي. پنهنجي هڪ بيان ۾ انهن چيو ته سڄي سنڌ جا عوام منظور وساڻ جي خانداني پس منظر ۽ ڪردار کان چڱي نموني واقف آهن ۽ سنڌ جو ٻچو ٻچو ڄاڻي ٿو ته منظور وساڻ بنيادي ذهني مريض ۽ نشي جا عادي آهن ۽ نشي جي ڪري ئي انهن جي ابتڙ سبتڙ ڳالھائڻ جي عادت بڻجي چڪي آهي ۽ نشي ۾ ٻڏي ڪري ئي اهي اڪثر ڪوڙا خواب به ڏسندا رهن ٿا جنهن جي ڪري سڄي ملڪ ۾ ماڻهو انهن تي کلندا آهن. انهن چيو ته منظور وساڻ جهڙي نفسياتي مريض کي سنڌ جي ڪابينا ۾ شامل ڪري سنڌ جي عوام سان وڏو مذاق ڪيو ويو آهي. جنهن تي وزير اعلٰي کي سنجيدگي سان غور ڪرڻ گهرجي. انهن سنڌ حڪومت کي مشورو ڏنو ته اها منظور وساڻ جو سرڪاري خرچ تي ڪنهن سٺي نفسياتي ڊاڪٽر کان علاج ڪرائي.
*****