ڪراچي ۾ ٿيندڙ فوتگين تي قومي اسيمبلي ۾ بحث جي دوران ايم ڪيو ايم جي پارليماني ليڊر رشيد گوڏيل جي تقرير کي پي ٽي وي تي سڌي ريت نشر نه ڪرڻ جي تحقيقات ڪرائي وڃي. ايم ڪيو ايم جي قومي اسيمبلي ميمبرن جو مطالبو.
ڪراچي؛ 24 جون 2015
قومي اسيمبلي جي حق پرست اسيمبلي ميمبرن ايم ڪيو ايم جي پارليماني ليڊر رشيد گوڏيل جي تقرير کي پي ٽي وي تي سڌي ريت نشر نه ڪرڻ جي سخت ترين لفظن ۾ مذمت ڪئي آهي. پنهنجي هڪ گڏيل بيان ۾ انهن چيو ته قومي اسيمبلي ۾ گرمي ۽ لڪ جي ڪري ڪراچي ۾ ٿيندڙ 1200 کان وڌيڪ ماڻهن جي هلاڪت تي بحث ٿي رهي هئي. ان بحث تي حڪومتي ميمبرن جي تقرير ته پي ٽي وي تي پوري نشر ڪئي وئي پر رشيد گوڏيل جي تقرير کي پي ٽي وي تي نه ڏيکاريو ويو. جيڪو ان ڳالھ جو ثبوت آهي ته حڪومت ڪراچي ۾ ٿيندڙ فوتگين تي حقيقتون سامهون اچڻ کان خوفزده آهي. انهن اختيار رکندڙ ڌرين کان مطالبو ڪيو ته رشيد گوڏيل جي تقرير کي پي ٽي وي تي سڌي ريت نشر نه ڪرڻ جي تحقيقات ڪرائي وڃي ۽ اهو تعصب وارو رويو رکڻ وارن جو محاسبو ڪيو وڃي.