گيس انفراسٽڪچر بل 2015 جي منظوري جو فيصلو واپس ورتو وڃي. قومي اسيمبلي جا حق پرست ميمبر.
ان بل جي منظوري سان سڄي ملڪ ۾ گيس جي صارفين کي 100 روپيا اضافي ادا ڪرڻا پوندا.
ڪراچي؛ 20 مئي 2015
قومي اسيمبلي جي حق پرست ميمبرن حڪومت جي طرفان قومي اسيمبلي ۾ گيس انفراسٽڪچر بل 2015 جي منظوري ڏيڻ جي سخت ترين لفظن ۾ مذمت ڪئي آهي ۽ ان بل جي منظوري کي پاڪستان جي غريب عوام جي معاشي مشڪلاتن ۾ اضافي جو ڪارڻ قرار ڏنو آهي. پنهنجي هڪ بيان ۾ انهن چيو ته مسلم ليگ ن جي حڪومت گيس انفراسٽڪچر جي ترقياتي محصول جي نالي تي سڄي ملڪ جي غريب عوام کي مالي مشڪلاتن جو شڪار ڪرڻ چاهي ٿي ۽ پنهنجي عددي اڪثريت جي هوَڏ تي قومي اسيمبلي ۾ گيس انفراسٽڪچر بل 2015 جي باضابطه منظوري ڏيئي پاڪستان جي غريب عوام کي مهانگائي جي ڌٻڻ ۾ ڌڪڻ جي ڪوشش ڪئي آهي ۽ ان بل جي منظوري سان پاڪستان ۾ گيس جي صارفين کي 100 روپيا اضافي ادا ڪرڻا پوندا ۽ انهن تي مالي بار به پوندو.انهن چيو ته 98 سيڪڙو غريب ۽ وچولي طبقي جا ماڻهو پهرين ئي مالي مشڪلاتن جو شڪار آهن. غربت، مهانگائي ۽ بي روزگاري عوام جي زندگي عذاب بڻائي ڇڏي آهي. جيڪڏهن حڪومت غريب عوام کي رليف نه ٿي ڏيئي سگهي ته ان کي وڌيڪ مالي مشڪلاتن جو شڪار به نه ڪري. انهن مطالبو ڪيو ته گيس انفراسٽڪچر بل 2015 جي منظوري جو فيصلو واپس ورتو وڃي ۽ سڄي ملڪ جي ماڻهن کي زنده رهڻ ۽ زندگي گذارڻ جون سهولتون فراهم ڪيون وڃن.