ايم ڪيو ايم جي ميمبر قومي اسيمبلي خواجه سهيل منصور ڪرپشن ۽ ڀتا خوري جو الزام عائد ڪرڻ تي ٽي وي چينل جي خلاف هڪ ارب روپين جي هرجاڻي جو نوٽس جاري ڪري ڇڏيو.
ڪراچي؛ 7 مئي 2015
متحده قومي موومينٽ جي ميمبر قومي اسيمبلي خواجه سهيل منصور پاڻ تي ڪرپشن ۽ ڀتا خوري جو الزام عائد ڪرڻ تي ٽي وي چينل جي خلاف هڪ ارب روپين جي هرجاڻي جو نوٽس جاري ڪري ڇڏيو آهي. واضع رهي ته ڪجھ ٽي وي چينلن تي نشر ٿيندڙ خبر ۾ انڪم ٽيڪس جي حوالي سان ايم ڪيو ايم جي ذميوارن ۽ ڪارڪنن جي خلاف ڀتي جو الزام لڳائڻ سان گڏو گڏ خواجه سهيل منصور تي به واپارين کان ڀتي وٺڻ ۽ انڪم ٽيڪس ۾ غير قانوني ڀرتين ڪرڻ جو الزام لڳايو ويو هو. خواجه سهيل پنهنجي وڪيل جي ذريعي ان ٽي وي چينل کي هڪ ارب روپين جي هرجاڻي جو نوٽس جاري ڪري ڇڏيو آهي. نوٽس ۾ چيو ويو آهي ته خواجه سهيل منصور هڪ وڏا واپاري ۽ صنعتڪار آهن. جن کي ٻيو ڀيرو قومي اسيمبلي جو ميمبر چونڊيو ويو آهي. اهي قومي اسيمبلي جي قائمه ڪميٽي برائي ناڻي جا چيئرمين به رهيا ۽ هن وقت اهي دفاعي پيداوار جي قائمه ڪميٽي جا چيئرمين آهن. خواجه سهيل کي 2007 ۾ پاڪستان ۾ سڀني کان وڌيڪ ٽيڪس ادا ڪرڻ ۽ پاڪستان جي لاءِ انهن جي خدمتن جي اعتراف تي حڪومت پاڪستان جي طرفان ستاره امتياز سان به نوازيو ويو هو. پر 5 مئي تي نشر ٿيندڙ خبر ۾ ته انهن انڪم ٽيڪس ڪراچي ۾ 300 انڪم ٽيڪس انسپيڪٽر ڀرتي ڪرايا آهن ۽ انهن تي واپارين کان ڀتي وٺڻ جو الزام به لڳايو ويو هو. اهڙي طرح انهن جي شهرت کي نقصان پهچايو ويو. خواجه سهيل ان ڪردار ڪشي ڪرڻ تي لاڳاپيل ٽي وي چينل کي نوٽس جاري ڪيو آهي ته اهو چينل ٽن ڏينهن جي اندر ڪوڙي ۽ بي بنياد خبر نشر ڪرڻ تي غير مشروط طور تي معافي وٺي نه ته انهن تي هڪ ارب روپين جي هرجاڻي جي وصولي جي لاءِ قانوني ڪاروائي ڪئي ويندي. خواجه سهيل انهن جي باري ۾ ڪوڙي ۽ بي بنياد خبر ڏيڻ تي ٻين ٽي وي چينلن ۽ اخبارن جي خلاف به قانوني ڪاروائي جي تياري ڪري رهيا آهن.