شاھ محمود قريشي جي طرفان جناب الطاف حسين تي بهتان تراشي ڪرڻ قابل مذمت آهي. ايم ڪيو ايم رابطا ڪميٽي.

ڪراچي؛ 6 مئي 2015 

             متحده قومي موومينٽ جي رابطا ڪميٽي تحريڪ انصاف جي رهنما شاھ محمود قريشي جي طرفان قائد تحريڪ جناب الطاف حسين تي بهتان تراشي ڪرڻ جي سخت ترين لفظن ۾ مذمت ڪئي آهي. پنهنجي هڪ بيان ۾ رابطا ڪميٽي چيو ته قائد تحريڪ جناب الطاف حسين ڪڏهن به پاڪ فوج جي جنرلن کي بزدل نه چيو آهي. شاھ محمود قريشي هڪ سياسي رهنما آهن ۽ انهن کي منافقت جو مظاهرو ڪرڻ نه ٿو ڀانئي. شاھ محمود قريشي قوم کي ٻڌائين ته انهن جي پاڪ فوج سان عقيدت ۽ محبت ان وقت ڪٿي هئي جڏهن انهن جي جماعت جا سربراھ عمران خان فوج جي جنرلن کي بزدل چئي رهيا هئا؟ اهڙي طرح شاھ محمود قريشي جي غيرت ڪهڙي تلاء ۾ غوطا کائي رهي هئي جو جڏهن عمران خان چئي رهيا هئا ته جيڪڏهن 20 هزار ماڻهو روڊن تي نڪري اچن ته انهن جنرلن جو مُٽ وهي وڃي. رابطا ڪميٽي چيو ته جڏهن جماعت اسلامي جي سابق امير سيد منور حسن ۽ وزير دفاع خواجه آصف فوج جي تذليل ڪري رهيا هئا ۽ فوجي جنرلن جي باري ۾ شر انگيز ڳالهيون ڪري رهيا هئا ته ان وقت شاھ محمود قريشي جي غيرت ڪٿي هئي. جيڪڏهن شاھ محمود قريشي کي پاڪ فوج سان ايتري ئي محبت آهي ته اهي قوم کي ٻڌائين ته فوج جي خلاف شر انگيز تقريرن ڪرڻ تي عمران خان ، خواجه آصف ۽ منور حسن جي خلاف ڪهڙي اسيمبلي ۾ مذمت جون قراردادون پيش ڪيون ويون ؟ رابطا ڪميٽي چيو ته شاھ محمود قريشي وڏي شوق سان جناب الطاف حسين جي بيان جي خلاف مذمتي قرارداد پيش ڪن پر مڪر و فريب ۽ ڪوڙ جي ذريعي نه ته فوج ۽ ايم ڪيو ايم جي وچ ۾ ڏار وجهي سگهجن ٿا ۽ نه ئي اهي عوام کي گمراھ ڪري سگهن ٿا.