گذريل ڏينهن قائد تحريڪ جناب الطاف حسين جماعت اسلامي جي امير سراج الحق کي پاڻ فون ڪيو هو ۽ انهن سان يمن ۽ سعودي عرب جي معاملي تي خيالن جي ڏي وٺ ڪئي هئي.
ڪراچي ؛ 30 مارچ 2015
متحده قومي موومينٽ جي ترجمان پنهنجي هڪ وضاحتي بيان ۾ چيو آهي ته گذريل ڏينهن ايم ڪيو ايم جي قائد جناب الطاف حسين جماعت اسلامي جي امير سيد سراج الحق کي پاڻ فون ڪيو هو ۽ انهن سان يمن ۽ سعودي عرب جي معاملي تي خيالن جي ڏي وٺ ڪئي هئي ۽ ان حوالي سان جاري ٿيندڙ ايم ڪيو ايم جي پريس رليز ۾ بلڪل به اهو تاثر نه ڏنو ويو آهي ته سراج الحق صاحب قائد تحريڪ جناب الطاف حسين کي فون ڪيو هو. ايم ڪيو ايم جي پريس رليز ۾ اهو چيو ويو آهي ته ايم ڪيو ايم جي قائد جناب الطاف حسين ۽ جماعت اسلامي جي امير سراج الحق صاحب جي وچ ۾ ٽيليفون تي رابطو ٿيو هو.ايم ڪيو ايم جي ترجمان چيو ته جيڪڏهن جماعت اسلامي کي ان حوالي سان ڪائي غلط فهمي ٿي آهي ته اسان وضاحت ڪرڻ ضروري سمجهون ٿا ته قائد تحريڪ جناب الطاف حسين سعودي عرب ۽ يمن جي وچ ۾ جنگ جي صورتحال تي پي پي جي چيئرمين آصف علي زرداري، اي اين پي جي سربراھ اسفند يار ولي، جميعت علماء اسلام جي سربراھ مولانا فضل الرحمٰن ۽ جماعت اسلامي جي امير جناب سراج الحق کي فون ڪيا هئا ۽ موجوده صورتحال تي خيالن جي ڏي وٺ ڪئي هئي.