متحده قومي موومينٽ جي حق پرست سينيٽرن ۽ قومي اسيمبلي جي ميمبرن زرد صحافت ۽ ايم ڪيو ايم جي ميڊيا ٽرائل جي خلاف اسلام آباد ۾ احتجاجي مظاهرو ڪيو.
اسلام آباد؛ 25 مارچ 2015
متحده قومي موومينٽ جي حق پرست سينيٽرن ۽ قومي اسيمبلي جي ميمبرن زرد صحافت ۽ ايم ڪيو ايم جي ميڊيا ٽرائل جي خلاف اسلام آباد ۾ پيمرا آفيس جي اڳيان احتجاجي مظاهرو ڪيو. مظاهري ۾ اسلام آباد، راولپنڊي ۽ فيصل آباد جي ذميوارن به شرڪت ڪئي. مظاهري جي شرڪاء پنهنجن هٿن ۾ پلي ڪارڊ کنيا جن تي ميڊيا ٽرائل جي خلاف نعرا درج هئا ۽ انهن ميڊيا ٽرائل جي خلاف زبردست نعري بازي به ڪئي.مظاهري کان پوءِ ڊاڪٽر خالد مقبول صديقي،رشيد گوڏيل ۽ ٻين پيمرا جي آفيس ۾ سينئر آفيسرن سان ملاقات ڪئي ۽ انهن کي ايم ڪيو ايم جي خلاف جاري ميڊيا ٽرائل جي حوالي سان مختلف پروگرامن جون سي ڊيز به پيش ڪيون. پيمرا جي سينيئر آفيسرن ايم ڪيو ايم جي وفد سان ڳالھ ٻولھ ڪندي چيو ته هڪ پرائيويٽ ٽي وي چينل جي پروگرام تي زرد صحافت جي ڪري پابندي هنئي وئي هئي. پر انهن عدالتن کان اسٽي آرڊر حاصل ڪري ورتو آهي. پيمرا ڪنهن به چينل يا پروگرام جي اينڪر پرسن کي ڪنهن به پارٽي جي خلاف يڪ طرفه ۽ حقيقتن جي خلاف ڳالھ ڪرڻ نه ڏيندو ۽ سڀني کي پيمرا جي قانونن جو پابند ڪيو ويندو. پيمرا وفد کي چيو ته اهڙا ٽي وي پروگرام جن ۾ ايم ڪيو ايم کي ميڊيا ٽرائل جي شڪايت آهي ته ان جي ازالي جي لاءِ ايم ڪيو ايم باقائده درخواست ڏيئي ته جيئن ان جي خلاف قانوني ڪاروائي ڪري سگهجي.