سنڌ حڪومت ۽ ان جا وزير ڪرپشن، بدعنواني ۽ اقربا پروري جي ڌٻڻ ۾ ڦاسي چڪا آهن. ايم ڪيو ايم رابطا ڪميٽي.

ڪراچي؛ 23 جنوري 2015 

             متحده قومي موومينٽ جي رابطا ڪميٽي چيو آهي ته سنڌ حڪومت ۽ ان جا وزير ڪرپشن، بدعنواني ۽ اقربا پروري جي ڌٻڻ ۾ ڦاسي چڪا آهن، ملڪ جي اعلٰي عدالت پنهنجن ريمارڪس ۾ اهو چئي چڪي آهي ته سنڌ حڪومت ۾ اهليت نه آهي ته اها صوبو سنڀالي سگهي ان جي  ڪري اها آئيني ترميم ڪري اعتراف ڪري ته اها صوبو  نه ٿي سنڀالي سگهي ۽ اهو چئي ته اها صوبو وفاق جي حوالي ڪري رهي آهي.پنهنجي هڪ بيان ۾ رابطا ڪميٽي چيو ته سپريم ڪورٽ کان علاوه نيب سنڌ جا ڊائريڪٽر جنرل سنڌ جي بيڊ گورننس ، ڪاغذن تي موجود اربين روپين جي ڪوڙين اسڪيمن، صوبي جي انتظامي افراسٽڪچر جي تباهي، ترقياتي اسڪيمن جا فنڊ ڪرپشن جي نذر ڪرڻ ۽ بدترين صورتحال جي نشاندهي ڪري چڪا آهن. جنهن مان ثابت ٿئي ٿو ته  صوبي ۾ غير معمولي حالتون آهن ۽ غير معمولي حالتن ۾ سنڌ ۾ مارشل لا جي نفاذ جو فيصلو سو سيڪڙو درست  آهي.رابطا ڪميٽي چيو ته اهو ئي نه پر سنڌ حڪومت 18 هين ترميم جي تحت صوبن کي ملڻ وارن اختيارن جو به ناجائز استعمال ڪري مشيرن  جي ڀرمار ڪئي آهي. رابطا ڪميٽي چيو ته ڪراچي ۽ سنڌ ته اڳ ۾ ئي بدامني ۽ قتل و غارتگري جو شڪار آهن ۽ هاڻي سنڌ اسيمبلي جي معزز ايوان کي به شرجيل ميمڻ ۽ حڪومتي وزيرن پنهنجي جاگير سمجهي ورتو آهي ۽ انهن جي ئي اشارن تي سنڌ اسيمبلي جي ڪاروائي ختم ڪئي وڃي ٿي جنهن مان ائين محسوس ٿئي ٿو ته شرجيل ميمڻ صوجي جا مالڪ بڻيل آهن.رابطا ڪميٽي چيو ته الله سائين جي لٺ بي آواز آهي ۽ انشاء الله تعالٰي سنڌ حڪومت جي ڪرپشن ۽ بدعنواني جو احتساب هڪ ڏينهن ضرور ٿيندو. رابطا ڪميٽي وڌيڪ چيو ته سنڌ حڪومت وٽ هاڻي بس هڪ ئي رستو آهي ته اها باعزت طريقي سان مستعفي ٿي وڃي.