معروف و ممتاز علمائے کرام علامہ محمد عون نقوی، علامہ اکرام حسین ترمذی، علامہ خلیل احمد کمیلی اور حکیم محمد احمد زیدی کا جناب الطاف حسین سے اظہار یکجہتی، تیسرے روز نمائش چورنگی پر اظہار یکجہتی دھرنے میں شرکت

کراچی ۔۔۔5، جون 2014ء 

متحدہ قومی موومنٹ کے زیر اہتمام نمائش چورنگی پر دیئے گئے دھرنے کے تیسرے روز معروف اور ممتاز علمائے کرام کے ایک وفد نے شرکت کی اور انہوں نے ایم کیوایم کی رابطہ کمیٹی کے ارکان سے ملاقات کرکے قائد تحریک جناب الطاف حسین سے دلی یکجہتی کا اظہار کیا۔ علمائے کرام کے وفد میں علامہ محمد عون نقوی، علامہ اکرام حسین ترمذی، علامہ خلیل احمد کمیلی اور حکیم محمد احمد زیدی شامل تھے ۔ اس موقع پر دھرنے کے شرکاء سے خطاب کرتے ہوئے مولانا عون محمد نقوی نے کہاکہ متحدہ قومی موومنٹ کے سربراہ اور قائد تحریک ،شیخ المشائخ حضرت الطاف حسین پر جن بعض دشمنان اسلام اور پاکستان کی طرف سے جو الزامات مختلف نوعیت کے لگا ئے جارہے ہیں ، انہیں ہراساں کیاجارہا ہے اور حراست میں لیا گیا آج ہم یہاں دھرنے میں ملت جعفریہ کی نمائندگی کرتے ہوئے ہر اس شخص سے جس کا دل الطاف حسین کے دل کے ساتھ دھڑکتا ہے اپنے دل کی دھڑکنیں ملانے کیلئے آئے ہیں ۔ انہوں نے کہا کہ جناب الطاف حسین پر اگر کوئی ظاہری طور پر مشکل وقت ہے تو باطل پرست قوتیں جان لیں کہ الطاف حسین کے ساتھ لاکھوں عوام کی دعائیں شامل ہیں ۔ہمارا پیغام برطانیہ کی پولیس کو پہنچا دیاجائے کہ الطاف حسین پر جو بھونڈے الزامات لگائے گئے ہیں وہ اس میں ملوث نہیں ہوسکتے، میں سیاسی آدمی نہیں لیکن سیاست سے جدا نہیں ہوں وہ سیاست جو دین سے تعلق نہیں رکھتی سیاست نہیں ہوسکتی ۔انہوں نے کہاکہ جیسے ہی یہ پیغام آیا کہ الطاف حسین کو گرفتار کرلیا گیا تو ذہنوں میں یہ خیال آیا کہ یہ شہر ایسے ہی جلے گا جیسے بینظیر بھٹو کی شہادت پر جلا تھا لیکن ایم کیوایم کے رہنماؤں نے اسے روکا جو قائد تحریک جناب الطا ف حسین کی پرامن پالیسی کا حصہ ہے ۔ انہوں نے دعا کی کہ اللہ تعالیٰ جناب الطاف حسین کو اس مشکل وقت سے نکلنے میں مدد فرمائے ۔