طالبان دہشت گردوں کے خلاف نبر دآزما مسلح افواج، رینجرز، ایف سی، پولیس اور دیگر قانون نافذ کرنے والے اداروں سے اظہار یکجہتی کیلئے اتوار 23 فروری کو کراچی میں ایک بڑی عوامی ’’یکجہتی ریلی‘‘ منعقد کی جائے گی۔ الطاف حسین کا اعلان

لندن۔۔۔21، فروری 2014ء

متحدہ قومی موومنٹ کے قائدجناب الطاف حسین نے اعلان کیاہے کہ طالبان دہشت گردوں کے خلاف نبردآزما مسلح افواج، رینجرز، ایف سی، لیویز، دیگر پیراملٹری فورسز ،پولیس اوردیگرقانون نافذ کرنے والے اداروں سے اظہاریکجہتی کیلئے اتوار 23 فروری کو کراچی میں ایک بڑی عوامی ’’یکجہتی ریلی‘‘ منعقد کی جائے گی ۔اس عوامی ریلی کے انعقاد کا فیصلہ رابطہ کمیٹی لندن اورپاکستان نے اپنے طویل اجلاس میں کیا۔ جناب الطاف حسین نے رابطہ کمیٹی اورتمام تنظیمی شعبوں سے صلاح مشورے کے بعد اس فیصلے کی توثیق کردی ہے۔جناب الطاف حسین نے کہاکہ رابطہ کمیٹی کے فیصلے کے تحت ایم کیوایم کے زیراہتمام ’’یکجہتی ریلی ‘‘ اتوارکوسہ پہر تین بجے کراچی میں شاہراہ قائدین پرنزدنورانی کباب ہاؤس منعقد کی جائے گی ۔ جناب الطاف حسین نے تمام شعبہ ہائے زندگی سے تعلق رکھنے والے عوام،صحافیوں، قلمکاروں، دانشوروں، حق پرست علمائے کرام، زاکرین، اینکرپرسنز، کیمرہ مینوں، فوٹوگرافروں، ٹیکنیشنز،طلبہ ،اساتذہ ،پروفیسرز، لیکچررز،طلبہ وطالبات، فنکاروں ، کھلاڑیوں، انجینئروں، ڈاکٹروں، وکیلوں، سول سوسائٹی، انسانی حقوق کی تنظیموں،خواتین انجمنوں، محنت کشوں، تاجروں، صنعتکاروں اور امیرغریب سمیت تمام طبقوں سے تعلق رکھنے والے عوام سے دردمندانہ اپیل کی کہ وہ اس یکجہتی ریلی میں بھرپورتعداد میں شرکت کرکے اسے تاریخی اورکامیاب بنائیں اورملک کوانسانیت دشمن طالبان دہشت گردوں کے خلاف برسرپیکار مسلح افواج، ایف سی ،پیراملٹری فورسز،پولیس اوردیگر قانون نافذ کرنے والے اداروں سے مکمل یکجہتی کااظہارکریں،انہیں اپنے بھرپورعملی تعاون کایقین دلائیں ۔ جناب الطاف حسین نے کہاکہ تمام شعبہ ہائے زندگی سے تعلق رکھنے والے عوام اپنے بھرپوراتحاد کامظاہرہ کرکے ثابت کردیں کہ مسجدوں، امام بارگاہوں، مزارات، دفاعی تنصیبات اور بازاروں کو بموں سے اڑانے والے دہشت گردوں اورفوجیوں اورمعصوم شہریوں کے گلے کاٹنے والے طالبان دہشت گردوں کے خلاف مسلح افواج ، پیراملٹری فورسز ، پولیس اورقانون نافذ کرنے والے اداروں کے اہلکار جس بہادری، جرات ہمت اوربے جگری سے لڑرہے ہیں اورقربانیاں دے رہے ہیں اس لڑائی میں عوام ان کے ساتھ ہیں اور شانہ بشانہ کھڑے ہیں۔ انہوں نے مزید کہاکہ تمام عوام اس یکجہتی ریلی میں بھرپورتعدادمیں شرکت کرکے اور اسے تاریخی ریلیوں میں سے ایک ریلی بناکرپوری دنیا کوبتادیں کہ دہشت گردی کے خلاف اس جدوجہد میں عوام اورمسلح افواج اورتمام قانون فانذ کرنے والے ادارے ایک ہی صف میں کھڑے ہیں۔