میرپورخاص میں جرائم پیشہ عناصر کی فائرنگ سے ایم کیوایم کے یونٹ ممبرمحمدراشدخان کی شہادت کے واقعہ پر رابطہ کمیٹی کا شدید اظہارمذمت

کراچی۔۔۔10،فروری 2014ء

متحدہ قومی موومنٹ کی رابطہ کمیٹی نے میرپورخاص میں جرائم پیشہ عناصر کی فائرنگ کے نتیجے میں ایم کیوایم میرپورخاص زون یونٹ 2-Aکے یونٹ ممبرمحمدراشدخان کی شہادت کے واقعہ کی شدیدمذمت کی ہے۔اپنے ایک بیان میں رابطہ کمیٹی نے کہاکہ اتوارکی شب تقریباًساڑھے نو بجے میرپورخاص کے علاقے مہران کالونی میں منشیات فروشوں نے علاقے میں واقع یونٹ آفس کے قریب جدید وخودکارہتھیاروں سے اندھا دھند فائرنگ کی ۔ ایم کیوایم کے یونٹ کمیٹی ممبر محمدراشدخان سینے میں گولی لگنے کے نتیجے میں شہید ہو گئے ۔ رابطہ کمیٹی نے کہاکہ ایم کیوایم کے زونل ذمہ داران نے علاقہ پولیس کے افسران کو جرائم پیشہ عناصرکی جانب سے فائرنگ کے بارے میں بروقت آگاہ کردیاتھالیکن پولیس نے بروقت علاقے میں پہنچ کر ان جرائم پیشہ عناصرکے خلاف کارروائی نہیں کی بلکہ عینی شاہدین کے مطابق یہ جرائم پیشہ عناصر پولیس کی حفاظت میں ہی علاقے سے فرارہوئے ۔ رابطہ کمیٹی نے واقعہ کی شدیدمذمت کرتے ہوئے وفاقی وصوبائی حکومت سے مطالبہ کیاکہ اس واقعہ کافوری نوٹس لیا جائے ، راشدخان شہید کے قتل میں ملوث جرائم پیشہ عناصر کوفی الفور گرفتار کیاجائے اوران جرائم پیشہ عناصر کی حمایت وسرپرستی کرنے والے پولیس افسران واہلکاروں کے خلاف بھی کارروائی کی جائے ۔