پشاور میں ملالہ یوسفزئی کی کتاب کی تقریب رونمائی روکنا آزادی رائے کے اصولوں کے منافی ہے ، رابطہ کمیٹی

کراچی ۔۔۔28، جنوری 2014ء 

متحدہ قومی موومنٹ کی رابطہ کمیٹی نے پشاور میں ملالہ یوسفزئی کی کتاب کی تقریب رونمائی کو خیبر پختونخواہ کی حکومت کی جانب سے روکنے جانے کی مذمت کی ہے اور سوال کیا ہے کہ خیبر پختونخواہ کی حکومت اتنی خوفزدہ کیوں ہے ۔ رابطہ کمیٹی نے کہاکہ اتنا خوفزدہ رہ کر حکومت نہیں چلائی جاسکتی ۔ رابطہ کمیٹی نے کہاکہ کتاب کی تقریب رونمائی کو روکنا آزادی رائے کے اصولوں کے منافی ہے ، صوبائی حکومت کو تقریب کے انعقاد کے لئے مناسب اقدامات کرنے چاہئے تھے ۔ رابطہ کمیٹی نے کہا کہ کتاب کی رونمائی کی تقریب کو روک کر صوبائی حکومت نے شہریوں کو تحفظ فراہم کرنے کی اور اپنی بنیادی ذمہ داری پر ناکامی کا اظہار کیا ہے ۔ رابطہ کمیٹی نے خیبر پختونخوا ہ کی صوبائی حکومت سے مطالبہ کیا کہ وہ تقریب کے انعقاد کیلئے ضروری اقدامات کریں اور تحفظ فراہم کرنے کی حکومتی ذمہ داری کو پورا کریں ۔