میں پاکستان میں ڈکٹیٹرشپ کی قوتوں کے خلاف جدوجہد کررہا ہوں۔ الطاف حسین
میں پاکستان سے ملٹری ڈکٹیٹرشپ کاخاتمہ چاہتا ہوں اورپاکستان کے عوام کوان کا پاکستان واپس دلانا چاہتا ہوں ۔ الطا ف حسین
پاکستان حکمراں طبقہ کے چند خاندانوں کا نہیں بلکہ عوام کا ہے
میری مظلوم عوا م سے درخواست ہے کہ حالات چاہے کتنے ہی مشکل اورکٹھن ہوں، آپ اپنی جدوجہدہرقیمت پر جاری رکھیں
ایم کیوایم برطانیہ کے زیراہتمام ہفتہ تشکر کی تقریب سے خطاب
لندن …28 جولائی 2024ئ
ایم کیوایم کے بانی وقائدجناب الطاف حسین نے کہاہے کہ میں پاکستان میں ڈکٹیٹرشپ کی قوتوں کے خلاف جدوجہد کررہا ہوں، میں پاکستان سے ملٹری ڈکٹیٹرشپ کاخاتمہ چاہتا ہوں اورپاکستان کے عوام کوان کاپاکستان واپس دلانا چاہتا ہوں جہاں وہ کسی جبر کے بغیرآزادی سے اپنی زندگی گزاریں ۔ جناب الطا ف حسین نے یہ بات ہفتہ کی شب ایم کیوایم برطانیہ کے زیراہتمام ہفتہ تشکر کی تقریب سے خطاب کرتے ہوئے کہی۔ تقریب میں ایم کیوایم برطانیہ کے کارکنوں اور ان کے اہل خانہ نے شرکت کی جن میں خواتین، بزرگ او ربچے بھی شامل تھے۔ تقریب سے اپنے خطاب میں جناب الطاف حسین نے کہاکہ پاکستان کا جوغریب ومظلوم اور متوسط طبقہ ہے جوظلم اورانصافیوں کی چکی میں پیسا جارہاہے، میں ان کے لئے لڑرہا ہوں ، پاکستان کا 2فیصد حکمراں طبقہ جودادا،پوتا، بیٹا، نواسہ، نواسی،نسل درنسل ملک پر حکومت کررہاہے ، پاکستان حکمراں طبقہ کے چند خاندانوں کا نہیں بلکہ پاکستان کے عوام کاہے ،یہی میری جدوجہد ہے
اورآخری سانس تک یہ جدوجہد جاری رہے گی۔ انہوں نے کہاکہ پاکستان کی فوج اورانٹیلی جینس ایجنسیاں آج بھی ایم کیوایم کے کارکنوں اور ہمدردوں کے ساتھ جبر کررہی ہیں مگر ہم اپنی پرامن جدوجہد جاری رکھے ہوئے ہیں۔
جناب الطاف حسین نے عوام سے اپیل کی کہ وہ اپنی صفوں میں اتحاد قائم کریں اوراپنے حقوق کے لئے جدوجہد کریں۔آپ یہ نہ سوچیں کہ دشمن طاقتورہے، اوپر اللہ ہے اورنیچے عوام کی طاقت ہے ، اگر اللہ کی مخلوق آپس میں متحد ہوجائے تو اللہ کی تائید بھی اسے حاصل ہوجاتی ہے اوراسے فتح نصیب ہوتی ہے ، تاریخ میں ایسا ہی ہوا ہے اورایسا ہی ہوتاچلا آیاہے ، یہ اللہ کافرمان ہے جورہتی دنیا تک کے لئے ہے ۔ انہوں نے کہاکہ حالات چاہے کتنے ہی مشکل اورکٹھن ہوں، آپ اپنی جدوجہد ہرقیمت پر جاری رکھیں یہی میری مظلوم عوا م سے درخواست ہے۔ جناب الطا ف حسین نے کہاکہ میری دعا ہے کہ پاکستان میں غریب بلوچوں، غریب پشتونوں،غریب پنجابیوں، سرائیکیوں، سندھیوں، مہاجروں، گلگتیوں، بلتستانیوں، کشمیریوں اور ہزار وال سمیت جوبھی اپنے حقوق کے لئے جدوجہد کررہاہے ،اللہ انہیں کامیابی عطافرمائے۔جناب الطاف حسین نے کہاکہ عوام کاپیار میرے لئے سب سے بڑی طاقت ہے ۔دعا ہے کہ رہتی دنیاتک یہ پیار برقراررہے ،میں دنیا سے جاؤں گا تویہ پیار لیکرجاؤں گا۔