ایم کیوایم کا34واں یوم تاسیس کارکنوں میں ایک نیا عزم وحوصلہ پیداکرنے کاسبب بنے گا۔ہاشم اعظم

لندن۔۔۔ 5، مارچ 2018ء

ایم کیوایم یوکے کے آرگنائزرہاشم اعظم نے کہاہے کہ ایم کیوایم کا34واں یوم تاسیس کارکنوں میں ایک نیا عزم وحوصلہ پیداکرنے کاسبب بنے گا۔ انہوں نے یہ بات ایم کیوایم یوکے نارتھ لندن یونٹ کے کارکنوں کے ایک اجلاس سے خطاب کرتے ہوئے کہی۔ اس موقع پر یوکے کی سینٹرل آرگنائزنگ کمیٹی کے رکن آصف سعید بھی موجود تھے ۔ ہاشم اعظم نے کہاکہ مہاجردشمن قوتیں ایم کیوایم کوختم کرنے کے درپے ہیں اورایم کیوایم کوصفحہ ہستی سے مٹانے کے لئے طرح طرح کے ہتھکنڈے اختیار کررہی ہیں ، کچھ ضمیرفروشوں نے اپنے مفادات کے حصول کے لئے اپنے ظرف وضمیرکاسودابھی کرلیاہے لیکن اس تمام تر صورتحال کے باوجودقائدتحریک الطاف حسین کے باوفااورباضمیرکارکنان اپنی وفاپر قائم رہتے ہوئے قوم کے حقوق اورآنے والی نسلوں کی باعزت زندگی کے لئے اپنی جدوجہدجاری رکھے ہوئے ہیں۔ ہاشم اعظم نے کہاکہ ایم کیوایم کا34واں یوم تاسیس جو اس مرتبہ ’’ یوم عزم وفا ‘‘ کے طورپرمنایاجارہا ہے ، اس کے سلسلے میں لندن میں ہونے والامرکزی اجتماع انشاء اللہ برطانیہ ہی نہیں بلکہ پاکستان اورتمام اوورسیز یونٹوں میں موجود تحریکی کارکنوں کے لئے عزم وحوصلے کاایک نیاپیغام ثابت ہوگا۔اس موقع پر نارتھ لندن یونٹ کے کارکنوں نے یوم تاسیس کی تیاریوں کی تفصیلات سے آگاہ کیا اوراس عزم کااظہار کیاکہ وہ اجتماع کو تاریخی بنانے کے لئے اپنی تمام ترصلاحیتیں بروئے کار لائیں گے۔ 

*****