تعزیتی ریفرنس میں شرکت کے لئے بیرون ممالک سے مہمانوں کی لندن آمد کاسلسلہ شروع ہوگیا ہے

لندن۔۔۔16، فروری2018ء

ممتازفلاسفر، مفکر، ترقی پسند دانشوراور بزرگ استاد اور ایم کیوایم کے سینئررہنما پروفیسرڈاکٹرحسن ظفر عارف شہید کوزبردست خراج عقیدت پیش کرنے کیلئے ایم کیوایم کے زیراہتمام ہفتہ 17فروری کو لندن میں تعزیتی ریفرنس منعقد کیا جائے گا۔ایم کیوایم کی رابطہ کمیٹی کے ارکان اوریوکے یونٹ کے ذمہ داران وکارکنان اس سلسلے میں تیار یوں میں مصروف ہیں ۔ تعزیتی ریفرنس میں برطانیہ کے ساتھ ساتھ امریکہ ، کینڈا، جرمنی،ناروے اوردیگرممالک سے بھی دانشور، وکلاء، بلاگرز، صحافی،اساتذہ اورمختلف شعبہ ہائے زندگی سے تعلق رکھنے والے افراد شرکت کریں گے۔ تعزیتی ریفرنس میں شرکت کے لئے بیرون ممالک سے مہمانوں کی لندن آمد کاسلسلہ شروع ہوگیا ہے۔اس تعزیتی ریفرنس میں شہیدوفا پروفیسرڈاکٹرحسن ظفر عارف شہید کی زندگی،پاکستان میں روشن خیال اور ترقی پسندمعاشرے کے قیام کیلئے ان کی جدوجہد، علمی وفکری خدمات اورقربانیوں پر روشنی ڈالی جائے گی اورانہیں زبردست خراج عقیدت پیش کیاجائے گا ۔ یہ تعزیتی اجتماع لندن کے شمال مغربی علاقے ایجویئرکے واٹلنگ کمیونٹی سینٹر واقع 145 Orange Hill Road, Edgware, Middlesex HA8 0TR میں ہفتہ 17فروری کو شام 7 بجے منعقد ہوگا۔ واضح رہے کہ پروفیسر ڈاکٹرحسن ظفر عارف شہید کو13جنوری 2018ء کو کراچی میں حراست میں لینے کے بعد تشدد کرکے ماورائے عدالت قتل کردیاگیاتھا۔انہیں 13جنوری کواغواکے اندازمیں حراست میں لیاگیاتھااور ان کی تشددزدہ لاش اگلے روزیعنی 14جنوری کو کراچی کے دوردراز ساحلی علاقے ابراہیم حیدری میں پائی گئی تھی ۔ 

*****