قائد تحریک الطاف حسین اورایم کیوایم لازم وملزوم ہیں ، قاسم علی رضا

لندن۔۔۔15، فروری2018ء

متحدہ قومی موومنٹ کی رابطہ کمیٹی کے ڈپٹی کنوینر قاسم علی رضا نے کہاہے کہ قائد تحریک جناب الطاف حسین اورایم کیوایم لازم وملزوم ہیں ۔ ایک بیان میں قاسم علی رضا نے کہاکہ سندھ کے شہری عوام ماضی کی طرح آج بھی قائد تحریک جناب الطاف حسین کی ولولہ انگیزقیادت میں متحد ومنظم ہیں ، ظلم وجبرکے ذریعے مہاجرقوم کو قائد تحریک جناب الطاف حسین سے دورکرنے کی ہرسازش کو ماضی کی طرح ناکامی کاسامنا دیکھنا پڑا ہے ۔ انہوں نے کہاکہ ایم کیوایم ایک نظریاتی تحریک ہے جس کے روح رواں قائد تحریک جناب الطاف حسین ہیں یہ ایم کیوایم کاطرہ امتیاز ہے کہ اس نظریاتی تحریک کو ریاستی طاقت سے مٹانے کی جتنی کوشش کی جائے گی ایم کیوایم اتنی ہی شدت سے ابھرے گی۔قاسم علی رضا نے کہاکہ ایم کیوایم کی جدوجہد میں ہزاروں شہداء کا لہو شامل ہے ، حق پرستی کے نظریہ کی بقاء کیلئے ہزاروں کارکنان قیدوبند کی صعوبتیں برداشت کررہے ہیں ، سینکڑوں آج بھی لاپتہ ہیں اور ہزاروں کارکنان اپنے گھروں سے دورجلاوطنی یا روپوشی کی کربناک زندگی گزارنے پر مجبور ہیں لیکن تمام ترمصائب ومشکلات کے باوجود آج بھی قائد تحریک جناب الطاف حسین کی قیادت میں متحد ہیں ۔ قاسم علی رضا نے کہاکہ قائد تحریک جناب الطاف حسین کے بغیر ایم کیوایم کی نہ تو کوئی حیثیت ہے، نہ کوئی اہمیت ہے۔ ریاستی طاقت کے ناجائز استعمال سے حق پرستی کے نظریہ کو نہ تو مٹایاجاسکتا ہے اورنہ ہی عوام کے دلوں سے قائد تحریک جناب الطاف حسین کی محبت ختم کی جاسکتی ہے ۔ قاسم علی رضا نے ایم کیوایم کے تمام ثابت قدم، پرعزم ، بے لوث اور وفاپرست بزرگوں ، ماؤں ، بہنوں اورتحریکی ساتھیوں پرزور دیا کہ وہ حالات کے جبرسے ہرگز مایوس نہ ہوں ، آپس میں اتحاد ومحبت سے حق پرستی کے نظریہ کو فروغ دیتے رہیں انشاء اللہ فتح حق پرستوں کا مقدر ثابت ہوگی اور باطل پرست قوتوں اوران کے گماشتوں کو عبرتناک شکست کا سامنا کرنا پڑے گا۔

****