شہیدوں کالہومجھ پر قرض ہے، اپنے شہیدوں کی قربانیاں رائیگاں جانے نہیں دوں گا. اپنی آخری سانس تک مقصدکے حصول کی جدوجہد جاری رکھوں گا.۔الطا ف حسین

متحدہ قومی موومنٹ کے قائدجناب الطاف حسین نے کہاہے کہ شہیدوں کالہومجھ پر قرض ہے، میں اپنے شہیدوں کی قربانیاں رائیگاں جانے نہیں دوں گااور اپنی آخری سانس تک مقصدکے حصول کی جدوجہد جاری رکھوں گا۔انہوں نے یہ بات پیر کی شب ایم کیوایم سکھرزون کے کارکنوں سے فون پر گفتگوکرتے ہوئے کہی۔ جناب الطاف حسین نے کہاکہ ماضی کی طرح ایک بارپھرہماری تحریک کڑی آزمائش کے دور سے گزررہی ہے لیکن اللہ تعالیٰ کاشکر ہے کہ اس نے ہمیں ثابت قدم رکھا اورہم تمام ترآزمائشوں اورکٹھن حالات کے باوجود اپنی جدوجہدجاری رکھے ہوئے ہیں، دیگرشہروں کی طرح آج بھی سکھرمیں الطاف حسین کے وفاشعاراورچاہنے والے ساتھی موجودہیں جس پرمیں انہیں سلام تحسین پیش کرتاہوں۔۔ انہوں نے کہاکہ اگرقومیں اجتماعی خودغرضی کالبادہ اوڑھ لیں تو وہ تباہ وبرباد ہوجایاکرتی ہیں لیکن اگر قوموں کی جدوجہدمیں چندلوگ بھی اپنافرض اداکرتے رہیں توایسی قومیں کبھی ختم نہیں ہوتیں۔ جناب الطا ف حسین نے کہاکہ میں نے اپنے ذاتی یاخاندانی مفادات کے بجائے قوم کے اجتماعی مفادات کے حصول کی بات کی، اگرمیں چاہتاتوآج نوازشریف اور زرداری سے زیادہ امیرہوتالیکن میں نے سیاست کو اپنے لئے مال ودولت کے حصول کاذریعہ نہیں بنایا، میرابھائی آج بھی کینیڈامیں ٹیکسی چلاکراپنے بیوی بچوں کاگزربسرکررہاہے۔ جناب الطا ف حسین نے کہا کہ میں نے شروع دن سے ہی ساتھیوں کویہ بتایا ہے کہ تحریک پھولوں کاسیج نہیں ہوتی بلکہ کانٹوں کی سیج ہوتی ہے، اب یہ اپنے اپنے ظرف کی بات ہوتی ہے انسان اس راہ پرچلتے ہوئے اپنے ظرف وضمیراورنظریہ پر قائم رہتاہے یانہیں۔ انہوں نے کہاکہ اللہ تعالیٰ جدوجہدکرنے والوں کاامتحان لیتارہتاہے، بالآخر اسے رحم آتاہے اوروہ جدوجہدکرنے والوں کوان کی جدوجہدکاپھل دیتاہے اورجولوگ ثابت قدم رہتے ہیں انہیں فتح سے ہمکنارکرتاہے۔جناب الطاف حسین نے کہاکہ 9دسمبرکویوم شہداہے لہٰذا تمام ساتھی اپنے شہیدوں کی قربانیوں کویادرکھیں، ان کے ایصال ثواب کے لئے فاتحہ خوانی کریں اورشہداکو خراج عقیدت پیش کریں۔ 

٭٭٭٭٭