پاکستان کے عوام ملک میں ہونے والے دہشت گردی کے واقعات کے باعث عیدالفطرسادگی سے منائیں ۔الطاف حسین

متحدہ قومی موومنٹ کے بانی وقائدجناب الطاف حسین نے تمام اہل پاکستان سمیت دنیابھرکے مسلمانوں کوعیدالفطر کی مبارکباد پیش کی ہے اورپاکستان کے عوام سے کہاہے کہ وہ ملک میں ہونے والے دہشت گردی کے واقعات کے باعث عیدالفطرسادگی سے منائیں ۔ اپنے ایک بیان میں انہوں نے کہاکہ اس مرتبہ بھی عیدالفطرایسے موقع پر آئی ہے کہ جب پورا پاکستان لہومیں ڈوباہواہے، ہر طرف آہیں ،سسکیاں اورماتم ہے ، کوئٹہ ، پاراچنار اورکراچی میں دہشت گردی کے بڑے واقعات میں بڑے پیمانے پر جانی نقصانات کے دکھ سے عوام ابھی نہیں سنبھل پائے تھے کہ آج احمدپورشرقیہ میں قیامت صغریٰ برپاہوگئی ہے اورایسالگتاہے کہ سانحہ احمدپورشرقیہ کے ذریعے کوئٹہ ، پارا چناراورکراچی کے واقعہ سے عوام کی توجہ ہٹانے کی کوشش کی گئی ہے ۔ جناب الطا ف حسین نے کہاکہ میں کوئٹہ، کراچی ، پاراچنار اوراحمدپورشرقیہ کے سانحات میں شہید ہونے والوں کے لواحقین کے غم میں برابرکاشریک ہوں اوردعاگوہوں کہ اللہ تعالیٰ متاثرین کویہ صدمہ برداشت کرنے کاحوصلہ اورصبرعطاکرے اورجاں بحق ہونے والے افرادکواپنی جواررحمت میں جگہ دے ۔ انہوں نے عوام سے کہاکہ وہ ان سانحات کے پیش نظر عیدالفطرسادگی سے منائیں اورعیدکی نمازوں میں سانحات کے شہدا کے لئے دعاکریں۔ انہوں نے ایم کیوایم کے تمام کارکنوں اور حق پرست عوام سے کہاکہ وہ عیدالفطر کے موقع پر اپنی دعاؤں میں تحریک کے شہیدوں کوضر وریادرکھیں، ان کے لئے دعائے مغفرت کریں اوران کے لواحقین کوغم بانٹیں۔ انہوں نے مزیدکہاکہ ہم مظلوم عوام کی حقیقی عیداسی وقت ہوگی جب ہمیں ظلم وجبرسے نجات حاصل ہوگی ۔

*****