قائدتحریک الطاف حسین کی جانب سے تمام کارکنوں ، حق پرست عوام اور تمام مظلوم پاکستانیوں کوشب براء ت کی مبارکباد

متحدہ قومی موومنٹ کے قائدجناب الطاف حسین نے ایم کیوایم کے تمام کارکنوں،شعبہ جات کے ارکان،ماؤں،بہنوں،بزرگوں، ہمدردحق پرست عوام اور تمام مظلوم پاکستانیوں کوشب براء ت کی مبارکبادپیش کی ہے ۔انہوں نے شب براء ت کے موقع پرانٹرنیشنل سیکریٹریٹ میں خصوصی دعا بھی کرائی ۔انہوں نے دعاکی کہ اللہ تعالیٰ تحریک کی جدوجہد میں اپنی جانوں کانذرانہ پیش کرنے والے تمام شہید وں کو شہادت کادرجہ عطاکرے، جومعذورہیں انہیں شفاء اور تندرستی عطاکرے۔اس کے ساتھ ساتھ جن کارکنوں کے والدین اوردیگررشتہ دار اس دنیاسے چلے گئے اللہ تعالیٰ ان کی مغفرت فرمائے ، لاپتہ ساتھیوں کو بازیاب کرائے ،اسیروں کی رہائی کوممکن بنائے ، تحریک کے مشن ومقصد کی وجہ سے روپوش اورجلاوطن ساتھیوں کواپنی حفظ وامان میں رکھے اورانہیں ثابت قدم رکھے۔اللہ تعالیٰ ایم کیوایم کے خلاف کی جانے والی سازشوں کوناکام بنائے ، مہاجرحقوق کی جدوجہدکوکامیابی سے ہمکنارکرے اورجولوگ تحریک سے غداری کرکے مہاجرکاذ کونقصان پہنچارہے ہیں ان کی رسی کھینچ لے ۔ اللہ تعالیٰ ظلم کی چکی میں پسنے والے تمام مظلوم پاکستانیو ں کی حالت زار پر بھی رحم فرمائے ، ان کی مشکلات کوبھی آسان فرمائے اوران کے مسائل حل کرے۔ 

*****