ایم کیوایم شاہ فیصل ٹاؤن کے 4کارکنان اور ایک ہمدرد مورخہ 13اگست کی صبح کراچی سے حیدرآباد جاتے ہوئے راستے سے لاپتہ ہوگئے ہیں

کراچی ۔۔۔13، اگست2016ء 

متحدہ قومی موومنٹ شاہ فیصل ٹاؤن کے 4کارکنان اور ایک ہمدرد مورخہ 13اگست کی صبح کراچی سے حیدرآباد جاتے ہوئے راستے سے لاپتہ ہوگئے ہیں ، ایم کیوایم نے اس خدشہ کااظہار کیا ہے کہ انہیں قانون نافذ کرنے والے اداروں کے اہلکاروں نے گرفتار کرنے کے بعد لاپتہ کردیا ہے جبکہ جس گاڑی میں کارکنان اور ہمدرد سوار تھے وہ گاڑی بھی ابھی تک نہیں ملی ہے ۔ لاپتہ ہونے والوں میں ایم کیوایم شاہ فیصل کالونی ٹاؤن یوسی 11کے یوسی آرگنائزر کامران خانزادہ ، یوسی کی کمیٹی کے رکن کمال خانزادہ ،کارکنان حارث خانزادہ ، عمیر اور ہمدرد گڈو شامل ہیں ۔ 

دریں اثناء متحدہ قومی موومنٹ کی رابطہ کمیٹی نے ایم کیوایم شاہ فیصل ٹاؤن یوسی 11کے 4کارکنان اور 1ہمدرد کے کراچی سے حیدرآباد جاتے ہوئے راستہ سے لاپتہ ہونے پر گہری تشویش کااظہار کیا ہے اور یہ خدشہ ظاہر کیا ہے کہ لاپتہ کارکنان اور ہمدرد کو قانون نافذ کرنے والے اداروں کے اہلکاروں نے غیر قانونی طور پر گرفتار کرکے لاپتہ کردیا ہے ۔ ایک بیان میں رابطہ کمیٹی نے کہا کہ کراچی ٹارگٹڈ آپریشن کی آڑ میں ایم کیوایم کے کارکنان کو گرفتار کرکے لاپتہ کرنے کے سینکڑوں واقعات ہوچکے ہیں اور اب بھی کارکنان کی بلاجواز گرفتاریوں کا سلسہ جاری ہے اس صورتحال میں ہمیں خدشہ ہے کہ ایم کیوایم شاہ فیصل کالونی ٹاؤن کے کارکنان اور ہمدرد کی گمشدگی بھی اسی سلسلے کی کڑی ہے تاکہ انہیں سرکاری حراست میں جبر وتشدد کا نشانہ بنا کر وفاداریاں تبدیل کرنے پر مجبور کیا جاسکے ۔ رابطہ کمیٹی نے کہاکہ لاپتہ کارکنان اور ہمدرد کے اہل خانہ شدید ذہنی کرب و اذیت میں مبتلا ہیں اور اپنے پیاروں کی بازیابی کے منتظر ہیں ۔ رابطہ کمیٹی نے وزیراعظم نواز شریف ، چیف آف آرمی اسٹاف جنرل راحیل شریف ، وفاقی وزیر داخلہ چوہدری نثار علی خان اور وزیراعلیٰ سندھ مراد علی شاہ سے مطالبہ کیا کہ کراچی سے حیدرآباد جاتے ہوئے ایم کیوایم شاہ فیصل کالونی ٹاؤن یوسی 11کے 4کارکنان اور ایک ہمدرد کے راستے سے لاپتہ ہوجانے کا سختی سے نوٹس لیاجائے اور لاپتہ کارکنان اور ہمددرد کی بازیابی کیلئے ہر سطح پر فی الفور اور عملی اقدامات بروے کار لائے جائیں ۔