ایم کیوایم کے اسیر کارکن وحید شیخ شہید کو شاہ فیصل کالونی عظیم پورا کے قبرستان میں آج آہوں اورسسکیوں کے درمیان سپرد خاک کردیاگیا

کراچی ۔۔۔8، اگست2016ء 

متحدہ قومی موومنٹ شاہ فیصل ٹاؤن کے اسیر کارکن وحید شیخ شہید کو شاہ فیصل کالونی عظیم پورا کے قبرستان میں آج آہوں اورسسکیوں کے درمیان سپرد خاک کردیاگیا ۔ شہید کی نماز جنازہ شاہ فیصل کالونی میں واقع اللہ والی مسجد میں ادا کی گئی ۔ نما زجنازہ اور تدفین میں ایم کیوایم کی رابطہ کمیٹی کے ارکان عارف خان ایڈووکیٹ ، سید اشرف نور ، رکن الدین ، حق پرست ارکان سندھ اسمبلی شیراز وحید ، نشاط محمد ضیاء ، ایم کیوایم سینٹرل ایگزیکٹو کونسل کے اراکین ، شاہ فیصل ٹاؤن کے ذمہ داران ، وکارکنان اور شہید کے عزیز واقارب نے بڑی تعداد میں شرکت کی ۔ دریں اثناء وحید شیخ شہید کا سوئم مورخہ9اگست بروز منگل کوشاہ فیصل کالونی نمبر 5میں واقع اللہ والی مسجد میں ہوگا جس میں شہید کی روح کے ایصال ثواب کیلئے قرآن خوانی وفاتحہ خوانی کی جائے گی ۔ 

نماز جنازہ اورتدفین کے بعد میڈیا کے نمائندگان کو پریس بریفنگ دیتے ہوئے ایم کیوایم کی رابطہ کمیٹی کے رکن عارف خان ایڈووکیٹ نے کہاکہ وحید شیخ کو جیل میں کسی قسم کے علاج و معالجہ کی سہولت فراہم کی گئی ، جیل انتظامیہ نے مکمل تعصب اور غفلت کا مظاہرہ کیا جس کے باعث وحید شیخ جانبر نہ ہوسکے ۔ انہو ں نے کہا کہ وحید شیخ کا قتل کھلا ماورائے عدالت قتل ہے اور ایم کیوایم کے خلاف جاری ریاستی آپریشن کا تسلسل ہے جس کی جتنی بھی مذمت کی جائے کم ہے ۔ انہوں نے کہاکہ 24جولائی کو رینجرز نے وحید شیخ کو بہیمانہ تشدد کا نشانہ بنانے کے بعد ماڈل کالونی تھانہ کو دیدیا تھا اور پھر شہید کو جیل کسٹڈی کردی گئی لیکن ان کے علاج و معالجہ پر کوئی توجہ نہیں دی گئی ۔ انہوں نے کہاکہ وحید شیخ شہید سمیت اب تک ایم کیوایم کے 62کارکنا ن کو ماورائے عدالت قتل کیا جاچکا ہے ، ہمارا مطالبہ ہے کہ وحید شیخ کے قتل کا مقدمہ جیل انتظامیہ اور رینجرز کے خلاف درج کیاجائے اور شہید کے لواحقین کو انصاف کی فراہمی یقینی بنائی جائے ۔ انہوں نے شہید کے تمام سوگوار لواحقین سے دلی تعزیت وہمدردی کااظہا رکرتے ہوئے صبر کی تلقین کی اور دعا کی کہ اللہ تعالیٰ شہید کو جنت الفردوس میں اعلیٰ مقام عطا فرمائے اور سوگواران کو یہ صدمہ برداشت کرنے کا حوصلہ عطاکرے ۔ عارف خان ایڈووکیٹ نے سپریم کورٹ کے چیف جسٹس سے اپیل کی کہ وہ وحید شیخ کے جیل میں تشدد سے ماورائے عدالت قتل پر سوموٹو ایکشن لیں اور قتل کے تمام ذمہ داران کو کیفر کردار تک پہنچائیں ۔