فلم ، ٹی وی اور اسٹیج کی ممتاز اداکارہ اور ہدایت کارہ محترمہ شمیم آراء کے انتقال پر جناب الطاف حسین کااظہار افسوس

لندن۔۔۔5، اگست2016ء 

متحدہ قومی موومنٹ کے قائد جناب الطاف حسین نے لندن میں فلم ، ٹی وی اور اسٹیج کی ممتاز اداکارہ اور ہدایت کار محترمہ شمیم آراء کے انتقال پر گہرے دکھ اور افسوس کااظہار کیا ہے ۔ ایک تعزیتی بیان میں جناب الطاف حسین نے کہاکہ محترمہ شمیم آراء مرحومہ نے بحیثیت ایک خاتون فلم انڈسٹری میں اداکارہ اور ہدایت کار کے طورپر کام کیا اور کئی فلمیں تخلیق کیں جس سے اندازہ لگایا جاسکتا ہے کہ پاکستانی خواتین میں ٹیلنٹ کی کمی نہیں ہے ۔ انہوں نے کہاکہ محترمہ شمیم آراء مرحومہ کی فلم انڈسٹری میں خدمات کو تسلیم کرتے ہوئے انہیں کئی ایوارڈز سے بھی نوازا گیا جو ان کی صلاحیتوں کا منہ بولتا ثبوت ہے ۔انہوں نے کہاکہ فلم انڈسٹری اور اس سے وابستہ تمام افراد کیلئے محترمہ شمیم آراء کے انتقال کی خبر دکھ اور صدمے کا باعث ہے۔ جناب الطاف حسین نے مرحومہ کے تمام سوگوار لواحقین سے دلی تعزیت وہمدردی کااظہار کرتے ہوئے کہاکہ مجھ سمیت ایم کیوایم کے تمام کارکنان آپ کے غم میں برابر کے شریک ہیں ۔ جناب الطاف حسین نے دعا کی کہ اللہ تعالیٰ مرحومہ کو جنت الفردوس میں اعلیٰ مقام عطا فرمائے اور سوگواران کو صبرجمیل عطاکرے۔