ضمیر فروشوں کا ٹولہ ایم کیوایم کے کارکنوں کی وفاداریاں تبدیل کرنے کیلئے اوچھے ہتھکنڈے اختیار کررہا ہے۔ رابطہ کمیٹی

کراچی ۔۔۔ 31 جولائی 2016ء

متحدہ قومی موومنٹ کی رابطہ کمیٹی نے کہاہے کہ ضمیرفروشوں کاٹولہ رینجرزاوردیگرسرکاری ایجنسیوں کے ساتھ ملکر ایم کیوایم کے کارکنوں کوگرفتار کروا رہا ہے اور انہیں انکی وفاداریاں تبدیل کرنے کیلئے اوچھے ہتھکنڈے اختیار کررہا ہے۔ اپنے ایک بیان میں رابطہ کمیٹی نے کہا کہ جب ضمیر فروشوں کاٹولہ تمام تر زہریلے پروپیگنڈوں کے باوجود ایم کیوایم کونقصان پہنچانے اورایم کیوایم کے باضمیر اور باغیرت کارکنوں کی وفاداریاں تبدیل کرنے میں ناکام ہوگیا ہے تو اپنے گھناؤنے ہتھکنڈوں میں ناکامی کے بعد اس ٹولے نے ایم کیوایم کے سینئر کارکنوں کی فہرستیں رینجرزکودے کران کے ذریعے کارکنوں کو گرفتار کروانا شروع کردیا ہے۔ کارکنوں کوگرفتارکرنے کے بعد انہیں سرکاری حراست میں بہیمانہ تشدد کا نشانہ بنایاجاتاہے اورپھرانہیں سرکاری حراست میں جان سے مارنے اور طرح طرح کے جھوٹے مقدمات میں ملوث کرنے کی دھمکیاں دے کروفاداریاں تبدیل کرنے اورضمیرفروش ٹولے میں شامل ہونے پر مجبور کیا جاتاہے ۔ اس طرح کے ہتھکنڈے استعمال کرکے کئی کارکنوں کوان کی وفاداریاں تبدیل کرنے پرمجبورکیاجاچکاہے۔ اس ضمیرفروش ٹولے کی جانب سے دی گئی لسٹ کے مطابق تین روز قبل بھی لیاقت آبادسے رینجرزنے ایم کیوایم کے ایک کارکن شاہدافروزکوحراست میں لیااورتشددکرنے کے بعد اسے ضمیر فروش ٹولے کے حوالے کردیا گیا۔ جبکہ گزشتہ ہفتہ بھی کئی ماہ سے لاپتہ تین کارکنوں کورینجرزنے اس ضمیرفروش ٹولے کے حوالے کیا جن کی حالت تشدد کی وجہ سے انتہائی ناگفتہ بہ تھی۔ رابطہ کمیٹی نے کہاکہ ان واقعات سے ایک بارپھرثابت ہوتاہے کہ یہ ٹولہ رینجرز اور سرکاری ایجنسیوں کے ساتھ ملکر ایم کیوایم کے خلاف مشترکہ طور پر سرگرم ہے ۔ رابطہ کمیٹی نے کہاکہ جوضمیرفروش عناصر اپنی ہی قوم کو نقصان پہنچانے کیلئے اس حد تک گرجائیں وہ کسی بھی طرح قوم کے دوست نہیں ہوسکتے۔