زیر حراست ایم کیو ایم کے نامزد حق پرست میئر کراچی وسیم اختر سے منسوب میڈیا پر چلنے والی خبریں سراسر من گھڑت، بے بنیاد اور جھوٹ پر مبنی ہے
وسیم اختر پر مختلف الزامات کے اعتراضات ایم کیو ایم کو بدنام کرنے اور دیوار سے لگانے کی سوچی سمجھی سازش ہے، رابطہ کمیٹی
12 مئی کو پولیس کو کام کرنے سے روکنے کے جھوٹے اور من گھڑت الزام لگانے والے یہ بھی بتائیں کہ 27 دسمبر کو جب شہر بھر میں قتل و غارتگری اور لوٹ مار کی وارداتیں ہورہی تھیں تو اس وقت پولیس کس کے حکم پر خاموش تماشائی بنی ہوئی تھی؟ رابطہ کمیٹی
جھوٹی اور من گھڑت اور یکطرفہ خبریں چلانے والے چینلز اپنے اخلاقی فرائض پورا کریں، رابطہ کمیٹی
کراچی ۔۔۔ 26، جولائی 2016ء
متحدہ قومی موومنٹ کی رابطہ کمیٹی نے اپنے ایک بیان میں کہا کہ زیر حراست ایم کیو ایم کے نامزد حق پرست میئر کراچی وسیم اختر سے منسوب میڈیا پر چلنے والی خبریں سراسر من گھڑت، بے بنیاد اور جھوٹ پر مبنی ہے۔ انہوں نے کہا کہ وسیم اختر نے کسی قسم کا کوئی اعترافی بیان نہیں دیا ہے اور نہ ہی کسی شخص کا نام لیا ہے۔ انہوں نے کہا کہ وسیم اختر ماضی میں بھی قائد تحریک الطاف حسین کے وفادار تھے اور اب بھی الطاف حسین کے وفادار ہے۔ انہوں نے کہا کہ وسیم اختر پر مختلف الزامات کے اعتراضات ایم کیو ایم کو بدنام کرنے اور دیوار سے لگانے کی سوچی سمجھی سازش ہے۔ انہوں نے کہا کہ اس سے قبل بھی امجد صابری کے قتل میں ایم کیو ایم کے ایک کارکن کا نام اور تصویر دیکھا کر انہیں قاتل بناکر پیش کیا گیا حالانکہ ایڈیشنل آئی جی سندھ مشتاق مہر نے خود میڈیا پر کہا کہ امجد صابری کے قتل کے الزام میں سندھ پولیس نے نہ ہی کوئی خاکہ جاری کیا اور نہ ہی کوئی گرفتاری کی ہے اس کے ساتھ ہی انہوں نے میڈیا سے درخواست کی تھی کہ وہ بنا ٹھوس ثبوت کے کسی کو بھی ملوث نہ کریں۔ انہوں نے کہا کہ12 مئی کو پولیس کو کام کرنے سے روکنے کے جھوٹے اور من گھڑت الزام لگانے والے یہ بھی بتائیں کہ 27 دسمبر کو جب شہر بھر میں قتل و غارتگری اور لوٹ مار کی وارداتیں ہورہی تھیں تو اس وقت پولیس کس کے حکم پر خاموش تماشائی بنی ہوئی تھی؟۔ اپنے بیان میں ایم کیو ایم رابطہ کمیٹی نے پیمرا حکام سے درخواست کی کہ جھوٹی اور من گھڑت اور یکطرفہ خبریں چلانے والے چینلز اپنے اخلاقی فرائض پورا کریں ۔