بنگلہ دیش میں عیدالفطر کے اجتماع میں بم دھماکے پر قائد ایم کیوایم الطاف حسین کااظہار مذمت

لندن ۔۔۔7، جولائی2016ء

متحدہ قومی موومنٹ کے قائد جناب الطاف حسین نے بنگلہ دیش میں عیدالفطر کے اجتماع میں بم دھماکے کی سخت ترین الفاظ میں مذمت کی ہے اور بم دھماکے میں سیکوریٹی اہلکاروں سمیت متعدد افراد کے شہید وزخمی ہونے پر گہرے دکھ اور افسوس کا اظہار کیا ہے ۔ ایک بیان میں جناب الطاف حسین نے کہاکہ بنگلہ دیش میں عیدالفطر کی نماز کے سب سے بڑے اجتماع میں دہشت گردی کا واقعہ عالمی برادری کیلئے لمحہ فکریہ اور اس بات کا ثبوت ہے کہ انتہاء پسندی عالمی امن کیلئے سنگین خطرہ بن چکی ہے۔ دین اسلام کی تعلیمات کے خلاف مذہبی انتہاء پسندی اور مذہبی جنونیت کا پرچار کرنے اورمعصوم وبے گناہ شہریوں کو دہشت گردی کا نشانہ بنانے والے انسانیت کے کھلے دشمن ہیں اوروقت کاتقاضا ہے کہ اس عفریت سے نجات کیلئے عالمی سطح پر مؤثر ، ٹھوس اور یونیفارم حکمت عملی بنائی جائے ۔ جناب الطاف حسین نے عیدالفطر کے اجتماع میں دہشت گردی کے واقعہ پر بنگلہ دیش کی وزیراعظم محترمہ حسینہ واجد، حکومت واپوزیشن جماعتوں کے ارکان، بنگلہ دیش کے عوام اور جاں بحق ہونے والے تمام افراد کے سوگوارلواحقین سے دلی تعزیت وہمدردی کااظہار کرتے ہوئے کہاکہ متحدہ قومی موومنٹ کے تمام کارکنان وہمدرد عوام ان کے غم میں برابر کے شریک ہیں۔ جناب الطاف حسین نے دعا کی کہ اللہ تعالیٰ جاں بحق افراد کو اپنی جوار رحمت میں جگہ دے اور زخمیوں کو جلد ومکمل صحت یاب کرے ۔ (آمین)