کراچی میں کالعدم تنظیمیں کھلے عام زکوٰۃ فطرے کے عطیات اورچندے جمع کررہی ہیں ۔رابطہ کمیٹی ایم کیوایم

کراچی ۔۔۔ 2 جولائی 2016ء

متحدہ قومی موومنٹ کی رابطہ کمیٹی نے کہاہے کہ کراچی میں کالعدم دہشت گرد تنظیمیں کھلے عام زکوٰۃ فطرے کے عطیات اورچندے جمع کررہی ہیں لیکن رینجرز کی جانب سے ان کے خلاف کسی قسم کی کارروائی نہ کیاجانابہت بڑاسوال ہے ۔ اپنے بیان میں رابطہ کمیٹی نے کہاکہ ایک جانب تو رینجرز نے ایم کیوایم کے رجسٹرڈ فلاحی ادارے خدمت خلق فاؤنڈیشن جس کی بڑے پیمانے پر فلاحی سرگرمیاں اورعوامی خدمت کے کارنامے کسی سے ڈھکے چھپے نہیں ہیں اس پر زکوٰۃ فطرہ جمع کرنے پر پابندی عائدکردی ہے ، زکوٰۃ فطرہ جمع کرنے پر ایم کیوایم کے کارکنوں، ذمہ داروں حتیٰ کہ کونسلروں اوریوسی ناظمین تک کو گرفتار کیا جارہا ہے ، انہیں بلابلاکردھمکیاں دی جارہی ہیں کہ وہ خدمت خلق فاؤنڈیشن کے لئے عطیات جمع نہ کریں جبکہ دوسری جانب کالعدم تنظیموں کے افرادکراچی کی مساجدکے باہراوربازاروں میں کھلے عام بلاروک ٹوک اورآزادانہ طورپر باقاعدہ اسٹال لگاکر زکوٰۃ فطرہ کے عطیات اورفنڈجمع کررہے ہیں لیکن ان کے خلاف کوئی کارروائی نہیں کی جارہی ہے بلکہ بعض مقامات پرکالعدم تنظیموں کے افراد رینجرز کے اہلکار وں کی موجودگی میں زکوٰۃ فطرہ اورچندے جمع کررہے ہیں جن کی وڈیوبعض ٹی وی چینلزپر بھی نشرہوئی ہیں ۔یہ صورتحال شہریوں کے سامنے ہے اورشہرکے عوام یہ سب کچھ اپنی آنکھوں سے دیکھ رہے ہیں کہ کون کیا کررہاہے ۔ رابطہ کمیٹی نے کہاکہ اگرقانون نافذ کرنے والے ادارے بھی دہراطرزعمل اختیارکریں گے تو انصاف قائم نہیں ہوسکتا۔