جنرل راحیل شریف، آفتاب احمدکے ماورائے عدالت قتل میں ملوث رینجرز اہلکاروں کو آئین اورقانون کے مطابق سزا دلوائیں، رابطہ کمیٹی کامطالبہ

کراچی۔۔۔26،جون2016ء

متحدہ قومی موومنٹ کی رابطہ کمیٹی نے چیف آف آرمی اسٹاف جنرل راحیل شریف سے مطالبہ کیا ہے کہ ایم کیوایم کے سینئر کارکن آفتاب احمدکے ماورائے عدالت قتل میں ملوث رینجرز اہلکاروں کو آئین اورقانون کے مطابق سزا دلوائی جائے ۔ ایک بیان میں رابطہ کمیٹی نے جنرل راحیل شریف کی کراچی آمد کے موقع پرکہاکہ جنرل راحیل شریف نے مئی 2016ء میں رینجرز کی حراست میں آفتاب احمدکے ماورائے عدالت قتل کانوٹس لیکر تحقیقات کا حکم دیا تھا جس کے نتیجے میں میڈیا کے ذریعہ یہ رپورٹس آئیں کہ رینجرز کے پانچ اہلکاروں کومعطل کرکے تحقیقات شروع کردی گئی ہیں لیکن اس دن سے آج کے دن تک نہ توآفتاب احمد کے ماورائے عدالت قتل میں ملوث رینجرز اہلکاروں کے چہرے، نام اور قومیت سے عوام کوآگاہ کیاگیا اورنہ ہی انہیں قانون کے کٹہرے میں کھڑا کرکے مقتول کے اہل خانہ کو انصاف فراہم کیاگیا۔ رابطہ کمیٹی نے کہاکہ جنرل راحیل شریف کو مخاطب کرتے ہوئے کہاکہ انصاف میں تاخیر، انصاف کے خون کے مترادف ہے ،آپ کی براہ راست ہدایت کے باوجوداب تک آفتاب احمد کے ماورائے عدالت قتل کی تحقیقات مکمل نہیں کی گئیں، آفتاب احمد شہید کے قاتل آج تک قانون کی گرفت سے محفوظ ہیں اور مقتول کے لواحقین کو انصاف دلانے کاعمل تاخیرحربوں کی نذرکیاجارہاہے ۔ رابطہ کمیٹی نے جنرل راحیل شریف سے مطالبہ کیاکہ آفتاب احمدکے ماورائے عدالت قتل کی تحقیقات جلد ازجلد مکمل کرائی جائے ، ماورائے عدالت قتل میں ملوث رینجرز اہلکاروں کو آئین اور قانون کے مطابق سزا دی جائے اوراس بارے میں عوام کو آگاہ کیاجائے۔