ایم کیوایم فیڈرل بی ایریا ٹاؤن کے فائنانس سیکریٹری سیدوقاراحمد کی گرفتاری قابل مذمت ہے۔ رابطہ کمیٹی

کراچی ۔۔۔ 20 جون 2016ء

متحدہ قومی موومنٹ کی رابطہ کمیٹی نے ایم کیوایم فیڈرل بی ایریا ٹاؤن کے فائنانس سیکریٹری سیدوقاراحمدکی گرفتاری کی شدیدالفاظ میں مذمت کی ہے ۔اپنے ایک بیان میں رابطہ کمیٹی نے کہاکہ سیدوقاراحمد آج شب 9بجے فیڈرل بی ایریا میں واقع ٹاؤن آفس سے باہرنکلے ہی تھے کہ قریب ہی پہلے سے موجود رینجرز اہلکاروں نے انہیں گرفتارکرلیا۔ وقاراحمدکوتشددکرتے ہوئے گاڑی میں ڈال کرنامعلوم مقام پر منتقل کردیا گیا۔ وقاراحمد پر کوئی مقدمہ نہیں لیکن صرف اور صرف ایم کیوایم کاذمہ دارہونے کی بنیاد پر انہیں گرفتار کیا گیا ہے۔ رابطہ کمیٹی نے کہا کہ یہ سب گرفتاریاں خیابان سحرمیں بیٹھے ضمیرفروش ٹولے کی نشاندہی پر کی جارہی ہیں جورینجرزکوایم کیوایم کے کارکنوں اورذمہ داروں کی لسٹیں دے رہے ہیں تاکہ انہیں گرفتارکرکے اورسرکاری حراست میں تشددکرکے اور دھمکیاں دے کرخفیہ قوتوں کی تشکیل کردہ پاک سرزمین پارٹی میں شامل کرایاجائے ۔اس مقصدکے لئے ایم کیوایم کے کارکنوں اورذمہ داروں کوچن چن کر گرفتار کیا جارہا ہے اورانہیں جھوٹے مقدمات میں ملوث کیاجارہاہے ۔رابطہ کمیٹی نے مطالبہ کیاکہ سید وقاراحمد کو رہا کیا جائے اورایم کیوایم کے کارکنوں کی گرفتاریاں بند کی جائیں۔