مہاجر قوم پر جو ظلم و ستم ہورہا ہے اس سے ہمارے قدم لڑ کھڑانے والے نہیں ہیں، آرمی چیف ایم کیوایم کے نوجوانوں کو گلے لگائیں ،کارکنان ملک کے استحکام اور سا لمیت کیلئے جانیں قربان کرنے کیلئے تیار ہیں، سینئر ڈپٹی کنوینر عامر خان

کراچی ۔۔۔29، مئی 2016ء

متحدہ قومی موومنٹ کی رابطہ کمیٹی کے سینئر ڈپٹی کنوینر عامر خان نے کہا ہے کہ کراچی کے عوام نے 1993ء کے الیکشن میں ثابت کیا تھا کہ وہ مہاجروں میں تقسیم کا عمل نہیں ہونے دیں گے ،مہاجر قوم پر جو ظلم و ستم ہورہا ہے اس سے ہمارے قدم لڑ کھڑانے والے نہیں ہیں، ملک میں آج کوئی مہاجروں کے بغیر حکومت نہیں بنا سکتا اور سب کو آکر نائن زیرو پر سر جھکانا پڑتا ہے اور جب ہی جاکر ملک میں حکومت بنتی ہے،آرمی چیف ایم کیوایم کے نوجوانوں کو گلے لگائیں اور ایم کیوایم کے کارکنان پاکستان کے استحکام اور سا لمیت کیلئے اپنی جانیں قربان کرنے کیلئے تیار ہیں۔ان خیالات کااظہار انہوں نے اتوار کے روز لیاقت آباد الکرم اسکوائر پر پی ایس 106کی نشست پر ہونے والے ضمنی الیکشن میں نامزد حق پرست امیدوار محفوظ یار خان کی انتخابی مہم کے سلسلے میں منعقدہ بڑاجتماع کے شرکاء سے خطاب کرتے ہوئے کیا جو بعد میں جلسہ کی شکل اختیار کرگئی ۔ کارنر میٹنگ میں پی ایس 106کے علاقے شریف آباد ، موسیٰ کالونی ، اسحاق آباد ، غریب آباد ، بندھانی کالونی ، یوسی 2ابن سینا ، لیاقت آباد 2، 4نمبر ، لیاقت آباد 10، 9، 8، پیلی کوٹھی اور راجپوت کالونی سمیت دیگر علاقوں سے تعلق رکھنے والے نوجوانوں ، بزرگوں اور خواتین ریلیوں اور جلوسوں کی شکل میں ہزاروں کی تعداد میں شرکت کی۔کارنر میٹنگ سے ایم کیوایم کی رابطہ کمیٹی کے رکن محمد کمال ،نامزد حق پرست امیدوار محفوظ یار خان اور حق پرست رکن سندھ اسمبلی عظیم فاروقی نے بھی خطاب کیا۔عامر خان نے اپنے خطاب میں کہا کہ لیاقت آبادجناب الطاف حسین کے چاہنے والوں اورجیالوں کا علاقہ ہے اور مجھے اس بات پر فخر ہے کہ میرا تعلق بھی لیاقت آباد سے ہے ۔انہوں نے کہا کہ گزشتہ تین برس سے ایم کیوایم کے کارکنان پر ریاستی آپریشن مسلط ہے ، ماورائے عدالت قتل اور جبری طور پر لاپتہ کیاجارہا ہے لیکن اس باوجود عوام جناب الطاف حسین کے ساتھ کھڑے ہیں جو لوگ یہ سمجھنے ہیں کہ وہ چند مفاد پرست ، چائنا کٹنگ کے ماسٹروں اور ٹارگٹ کلنگ والوں کو ایک جگہ اکٹھا کر مہاجر قوم میں تقسیم کردیں گے انہیں یاد دلانا چاہتا ہوں کہ 1992ء میں ایک ایسا ہی عمل ہوا تھا جب حقیقی کو لایا گیا تھا اور میں بھی اس کا حصہ تھا لیکن کراچی کے عوام نے 1993ء کے الیکشن میں ثابت کیا تھا کہ وہ ایسی کسی سازش اور مہاجروں میں تقسیم کا عمل نہیں ہونے دیں گے ۔