وڈیرے ، جاگیردار غریب لوگوں سے ووٹ لیکر منتخب ہوکر حکومتی اختیارات کا ناجائز استعمال کرتے ہیں ، رکن رابطہ کمیٹی محمد حسین
سندھ کا کوئی بھی مظلوم وڈیرے کے ظلم کا شکار ہے تو نائن زیرو آکر پناہ لے سکتا ہے، نامزد حق پرست میئر وسیم اختر
ظالم وڈیرکو گرفتار نہیں کیا گیا ہے ،وزیراعلیٰ سندھ نے جھوٹ سے کام لیا ہے، سندھ اسمبلی میں قائد حزب اختلاف خواجہ اظہار الحسن
جناب الطاف حسین واحد لیڈر ہیں جو شروع دن سے ملک میں رائج اس فرسودہ نظام کے خاتمے کی جدوجہد
کررہے ہیں سی ای سی رکن ساتھی اسحاق
وڈیرے سندھ میں معصوم عوام کا کاروکاری اور خود ساختہ رسومات کے ذریعے استحصال کررہے ہیں، حق پرست رکن سندھ اسمبلی ہیر سوہو
نوشہرو فیروز میں وڈیرے کی جانب سے مزدوروں پر تشدد اور اور غیر قانونی جرگے کے ذریعے انسانی سزائیں دینے کے خلاف کراچی پریس کلب پر منعقدہ بڑے احتجاجی مظاہرے سے مقریرین کا خطاب
کراچی ۔۔۔20، مئی 2016ء
رابطہ کمیٹی کے رکن محمد حسین نے کہا کہ ظام وڈیرے کے خلاف ایم کیوایم کا احتجاجی مظاہرہ انسانیت کی عزت وقار کی خاطر اور مظلوم اور پسے ہوئے اور ظلم کا شکار لوگوں سے اظہاریکجہتی کیلئے ہے ۔ سندھ ،بلوچستان ، کے پی کے ، پنجاب میں وڈیرے ، جاگیرداراور سردار اپنی دولت کی طاقت کے بل بوتے پر مظلوم لوگو ں کو اپنے ظلم کا شکار بناتے رہے ہیں اور آج بھی بنا رہے ہیں ۔ انہوں نے کہاکہ وڈیرے اور جاگیردار غریب لوگوں کے ووٹ سے منتخب ہوکر ملک کے ایوانوں میں پہنچتے ہیں اور پھر حکومتی اختیارات کا ناجائز استعمال کرتے ہوئے پاکستان کے 98فیصد مظلوم لوگو ں پر ظلم و ستم ڈھاتے ہیں ۔ان خیالات کااظہار انہوں نے جمعہ کے روز نوشہرو فیروز میں وڈیرے کی جانب سے غریب مزدوروں پر تشدد اور غیر قانونی جرگے کے ذریعے غیر انسانی سزائیں دینے کے خلاف کراچی پریس کلب کے باہر منعقدہ ایک پرامن احتجاجی مظاہرے سے خطاب کرتے ہوئے کیا ۔ احتجاجی مظاہرے سے سندھ اسمبلی میں ایم کیوایم کے قائد حزب اختلاف خواجہ اظہار الحسن ، نامزد میئر کراچی وسیم اختر ، سی ای سی کے ارکان ساتھی اسحق ، ہیر سوہو اور مزدروں کے چاچا نے بھی خطاب کیا ۔ رابطہ کمیٹی کے رکن محمد حسین نے اپنے خطاب میں کہا کہ نوشہروفیروز کے ظالم وڈیرے کی گرفتاری ہی کافی نہیں بلکہ جرگے میں شریک تمام افراد اور پولیس اہلکاروں کوبھی گرفتار کیاجانا چاہئے ۔ انہوں نے مقامی اخبار کے نمائندے صابر شاہ کی پانامہ لیکس کے حوالے سے جھوٹی خبر کی مذمت کی اور کہاکہ ایم کیوایم واحد جماعت ہے وہ جب سے وجودمیں آئی ہے اس پر کرپشن کا کوئی دھبہ نہیں لگا ہے اور ایم کیوایم صابر شاہ کی جھوٹی خبر پر قانونی نوٹس بھی بھجوائے گی ۔انہوں نے کہاکہ قائد تحریک جناب الطاف حسین نے ہمیں پرامن رہنے اور صبر کا درس دیا ہے یہی وجہ ہے کہ سندھ کے وڈیرے اندرون سندھ اور کراچی میں حقیقی دہشت گرد اپنی غنڈہ گردی کررہے ہیں اگر جناب الطاف حسین کی صبر کی تلقین ہمیں نہ ہوتی تو ظالم وڈیرے اور حقیقی دہشت گرد کبھی بھی مظلوم عوا م کو اپنے ظلم کا نشانہ نہیں بنا سکتے تھے ۔ نامزد حق پرست میئر وسیم اختر نے کہا کہ یہ ملک کے عوام کی بد قسمتی ہے کہ یہ جب سے وجود میں آیا ہے اس پر جاگیردارانہ نظام کی سوچ کے حامل بااثر افراد نے قبضہ کیا ہے جنہیں یہ معلوم نہیں ہے کہ ان کے علاوہ بھی ہر شہری کے حقوق ہیں ۔