ایم کیوا یم کے سابق اراکین اسمبلی کا جنرل راحیل شریف کی جانب سے ایم کیو ایم کے کارکن آفتاب احمد کی رینجرز کی حراست میں ہلاکت کا نوٹس لینے اور تحقیقات کے حکم کا خیرمقدم

واشنگٹن ڈی سی ۔۔۔ 13؍ مئی 2016ء

متحدہ قومی موومنٹ کے سابق حق پرست اراکین اسمبلی معید صدیقی، وکیل احمد جمالی، سہیل یوسف زئی اور فرخ نعیم نے اپنے ایک مشترکہ بیان میں میں پاک فوج کے سربراہ جنرل راحیل شریف کی جانب سے ایم کیو ایم کے کارکن اور ایم کیو ایم رابطہ کمیٹی کے سینئر ڈپٹی کونیر ڈاکٹر فاروق ستار کے کوآرڈینیٹر آفتاب احمد کی رینجرز کی حراست میں ہلاکت کا نوٹس لینے اور تحقیقات کے حکم کا خیرمقدم کرتے ہوئے کہا کہ دوران تحقیقات اس بات کی تحقیقات کی جائے کہ گرفتاری سے چند روز قبل آفتاب احمد کو پاک سر زمین پارٹی کے کس رہنما نے فون کرکے اپنی پارٹی میں شمولت اختیار کرنے کیلئے دباؤ ڈالا تھا۔انہوں نے کہا کہ رینجرز میں موجود ان متعصب افسران کے خلاف بھی سخت سے سخت کاروائی کی جائے جو اپنے ذاتی ایجنڈے کی تکمیل کے جوش میں کراچی میں ایم کیو ایم کے کارکنوں اور مہاجروں کو نشانہ بنانے اور پاک فوج کے غیر جانبدارانہ کردار کو مجروح کرنے سر گرداں ہیں۔ انہوں نے کہا کہ چیف آف آرمی اسٹاف جنرل راحیل شریف اس بات کا بھی نوٹس لیں کہ کراچی میں قانون نافذ کرنے والے اداروں کے چند اہلکار ایم کیو ایم کے کارکنان پر دباؤ ڈال کر انہیں ضمیرفروش ٹولے میں شامل ہونے کیلئے مجبور کررہے ہیں اور انکار کی صورت میں انہیں جھوٹے مقدمات میں ملوث کررہے۔ اپنے بیان کے آخر میں سابق حق پرست اراکین اسمبلی نے کہا کہ ہمیں امید ہے کہ پاک فوج کے سپہ سالار جنرل راحیل شریف ان کی گزارشات پر غور فرمائیں گے۔