علی حیدر گیلانی کی باحفاظت وطن واپسی پر ایم کیوایم رابطہ کمیٹی کی دلی مبارکباد

لندن ۔۔۔ 11، مئی 2016ء 

متحدہ قومی موومنٹ کی رابطہ کمیٹی نے سابق وزیراعظم پاکستان یوسف رضا گیلانی کے صاحبزادے علی حیدر گیلانی کی باحفاظت واپسی پر دل کی گہرائیوں سے مبارکباد دیتے ہوئے کہا کہ اللہ تعالیٰ نے آپ پر اور آپ کے اہل خانہ پر اپنا کرم کیا اور ایک طویل عرصے تقریبا3سال تک آپ کا بیٹا آپ سے بچھڑا رہا جو ،اب صحیح سلامت بازیاب ہوگئے ہیں ۔ ایک بیان میں رابطہ کمیٹی نے کہا کہ سابق وزیراعظم یوسف رضا گیلانی کی قسمت اللہ تعالیٰ نے ہیرے اور سونے سے لکھی ہے جبکہ مہاجروں کی قسمت نہ جانے کس کچی سیاہی سے لکھی ہے کہ مہاجر مائیں اپنے لخت جگروں کے بچھڑنے پر رو رو کر اپنی آنکھیں تک گنوا بیٹھی ہیں اور کچھ اپنے بیٹوں کے ملنے کی آس کی امیدیں لئے انتظار کرتے کرتے اس دنیا سے رخصت ہوچکی ہیں ۔ رابطہ کمیٹی نے یوسف رضا گیلانی اور ان کے اہل خانہ کو مخاطب کرتے ہوئے کہا کہ آپ کا بیٹا آپ کو سلامت ہو ، ان کی بحفاظت واپسی مبارک ہو اور ہم بھی آپ کی اس خوشی میں شریک ہیں ۔