آفتاب احمد کے ماورائے عدالت قتل میں ملوث رینجرز اہلکاروں کی گرفتاریاں انصاف کی فراہمی کی جانب پہلا عملی قدم ہے، چیئرمین و مرکزی کابینہ اے پی ایم ایس او

کراچی ۔۔۔11، مئی 2016ء 

آل پاکستان متحدہ اسٹوڈنٹس آرگنائزیشن کے چیئرمین و اراکین مرکزی کابینہ نے اپنے ایک بیان میں کہا کہ ایم کیوایم کے کارکن اور رابطہ کمیٹی کے سینئر ڈپٹی کنوینر ڈاکٹر فاروق ستار کے کو آرڈی نیٹر آفتاب احمد کے ماورائے عدالت قتل میں ملوث رینجرز اہلکاروں کی گرفتاریاں انصاف کی فراہمی کی جانب پہلا عملی قدم ہے اور ہم امید کرتے ہیں کہ آفتاب احمد شہید کے ماورائے عدالت قتل کی تحقیقات میں مصلحت اور دباؤ کو خاطر میں نہ لاتے ہوئے انصاف کے تمام تقاضے پورے کئے جائیں گے۔ اپنے مشترکہ بیان میں انہوں نے کہاکہ چیف آف آرمی اسٹاف جنرل راحیل شریف نے آفتاب احمد شہید کے رینجرز کی حراست میں انسانیت سوز تشدد سے قتل کا نوٹس لیکر اور اسکی شفاف تحقیقات کا حکم دیکرواضح کردیا ہے کہ وہ انصاف کی فراہمی پر مکمل یقین رکھتے ہیں اور عہدے ، مرتبے اور اختیارات کو مظلوموں کی داد رسی اور ظالموں کی بیخ کنی کیلئے استعمال کرنے کا عزم کئے ہوئے ہیں جس پر ہم آرمی چیف جنرل راحیل شریف کو زبردست خراج تحسین پیش کرتے ہیں ۔ انہوں نے کہاکہ آفتاب احمد شہید کی رینجرز تحویل میں ماورائے عدالت قتل کی شفاف تحقیقات ملک کی سلامتی کے ضامن اداروں کی ساکھ کی بحالی کیلئے بھی ضروری ہے جن رینجرز اہلکاروں نے آفتاب احمد شہید کو انسانیت سوز تشدد کا نشانہ بنا کر ماورائے عدالت قتل کیا ہے وہ کسی بھی قسم کی رعایت اور نرمی کے نہیں بلکہ آئین و قانون کے مطابق سخت سے سخت ترین سزا کے مستحق ہیں ۔ انہوں نے کہاکہ 11مارچ 2013ء کو ایم کیوایم کے مرکز نائن زیرو عزیز آباد پر رینجرز کے چھاپے کے دوران اے پی ایم ایس او کے کارکن اور شعبہ اطلاعات کے رکن وقاص علی شاہ بھی رینجرز کی فائرنگ سے شہید ہوگئے تھے اور ان کے قتل میں ملوث اہلکار اب تک قانون کی گرفت سے محفوظ ہیں یہ ہی نہیں بلکہ 2013ء کے کراچی ٹارگٹڈ آپریشن کی آر میں ایم کیوایم کے40سے زائد کارکنان کو ماورائے عدالت قتل کردیاگیا اور اب بھی ایم کیوایم کے 140سے زائد کارکنان گرفتاریوں کے بعد سے لاپتہ ہیں جن کے اہل خانہ بھی انصاف کیلئے چیف آف آرمی اسٹاف جنرل راحیل شریف کی جانب دیکھ رہے ہیں اوریہ امید اور آس لگائے بیٹھے ہیں کہ جس طرح آفتاب احمد شہید کا چیف آف آرمی اسٹاف جنرل راحیل شریف نے نوٹس لیا اسی طرح ان کے پیاروں کیلئے بھی اپنے عہدے ، مرتبے اور اختیارات کا استعمال کریں گے اور انہیں انصاف دلائیں گے ۔