ایک سال سے لاپتہ لاہورکی مقامی صحافی زینت شہزادی کوبازیاب کرایاجائے ۔ رابطہ کمیٹی

کراچی ۔۔۔ 10 مئی 2016ء

متحدہ قومی موومنٹ کی رابطہ کمیٹی نے صدرمملکت ممنون حسین، وزیراعظم میاں نوازشریف ، چیف آف آرمی اسٹاف جنرل راحیل شریف ،وفاقی وزیرداخلہ چوہدری نثار علی خان اوروزیراعلیٰ پنجاب میاں شہبازشریف سے مطالبہ کیاہے کہ لاہورکی مقامی صحافی زینت شہزادی کوبازیاب کرایاجائے ۔ اپنے ایک بیان میں رابطہ کمیٹی نے کہاکہ زینیت شہزادی ایک صحافی کی حیثیت سے لاپتہ افراد کے کیسز کی اسٹوری پر کام کررہی تھیں کہ گزشتہ سال19 اگست 2015ء کو انہیں نامعلوم افرادنے لاہورسے اس وقت اغواکرلیاجب وہ لاپتہ افرادکیلئے قائم کمیشن میں پیش ہونے جارہی تھیں۔ ایک سال ہونے کوآیاہے لیکن تاحال زینیت شہزادی کاکچھ پتہ نہیں چل سکاہے۔ زینت شہزادی کابھائی اپنی بہن کی عدم بازیابی کے صدمے کونہ سہہ سکا اورکچھ عرصہ قبل اس نے خودکشی کرلی جبکہ زینیت شہزادی کی ماں اپنی بیٹی کی جبری گمشدگی اوربیٹے کی موت کے دہرے صدمے کے باعث شدیدذہنی اذیت سے دوچارہیں اوراپنی بیٹی کی بازیابی کے لئے تقریباًایک سال سے دردرکی ٹھوکریں کھارہی ہیں۔ رابطہ کمیٹی نے زینیت شہزادی کی ماں سے دلی ہمدردی کااظہارکیااور صدرممنون حسین، وزیراعظم نوازشریف ، آرمی چیف جنرل راحیل شریف ، وزیرداخلہ چوہدری نثار علی خان اوروزیراعلیٰ پنجاب شہبازشریف سے مطالبہ کیا کہ زینت شہزادی کی جبری گمشدگی ایک سیاسی نہیں بلکہ مکمل طورپرایک انسانی حقوق کامسئلہ ہے لہٰذا اس مسئلہ پر ہمدردانہ غورکیاجائے اوراسے فی الفوربازیاب کرایاجائے اوران کی والدہ کوذہنی اذیت سے نجات دلائی جائے ۔