مصطفی کمال جیسے ضمیر فروش اور موقع پرست کے کہنے سے عوام جاہل نہیں ہوسکتی ، عارف خان ایڈووکیٹ

کراچی ۔۔۔8، مئی 2016ء 

متحدہ قومی موومنٹ کی رابطہ کمیٹی رکن عارف خان ایڈووکیٹ نے ضمیر فروش ٹولے کے سربراہ ہ مصطفی کمال کے اس بیان پر کہ ’’کراچی پہلے تعلیم کا گہوارہ تھا ، اب جاہلوں کا شہر بن گیا ہے ‘‘تبصرہ کرتے ہوئے کہا ہے کہ کراچی کے عوام پاکستان میں سب سے زیادہ پڑھے لکھے اور باشعور ہیں اور ہمیشہ دوسروں سے زیادہ اچھے اور بروں کی پہچان رکھتے ہیں اور یہ بھی جانتے ہیں کہ کون ان سے مخلص ہے اور کون مفاد پرست ، یہی وجہ ہے کہ کراچی کے عوام نے ہمیشہ قائدتحریک جناب الطاف حسین کا ساتھ دیا ہے ۔ اپنے ایک بیان میں عارف خان ایڈووکیٹ نے مصطفی کمال کے عوام دشمن بیان پر شدید برہمی ، غم و غصہ کا اظہار کیا اور تنقید کرتے ہوئے کہاکہ مصطفی کمال جیسے ضمیر فروش اور موقع پرست کے کہنے سے نہ تو عوام جاہل ہوسکتی ہے اور نہ ہی بے شعور ۔ انہوں نے کہا کہ مصطفی کمال کی پرانی عادت ، دھونس دھمکی کے طور طریقہ اور لہجہ میں اب تک کوئی کمی نہیں آئی ہے ، سٹی ناظم کے زمانے میں بھی بعض لوگوں سے وہ تلخ زبان استعمال کرتے تھے جس کی ایک مثال عباسی شہیداسپتال میں خواتین سے بدکلامی اور نازیبا الفاظ کا استعمال ہے جس کی سی ڈی بھی موجود ہے ۔ عارف خان ایڈووکیٹ نے کہاکہ عوام کا احترام ہر ایک ہر لازم و ملزوم ہے ، مصطفی کمال کو عوام کو جاہل قرار دینے کا کوئی حق حاصل نہیں ہے اور وہ لوگوں کی دل شکنی سے پرہیز کریں ورنہ انہیں بھی عوام کے غیض و غضب کا سامنا کرنا پڑے گا ۔