اگر ہم قائد جناب الطاف حسین کے فکرو فلسفے اور نظریہ پر ثابت قدم رہے تو یقیناًفتح ہمارا مقدر ہوگی، زریں مجید

کراچی ۔۔۔۔07مئی 2016

ایم کیو ایم رابطہ کمیٹی کی رکن محترمہ زرین مجید نے کہا ہے کہ قائد تحریک جناب الطاف حسین نے ہمیشہ کڑے اور مشکل وقت میں اپنی ہمت استقامت اور حکمت عملی سے ہر دور کے سازشی عناصر کو شکستِ فاش دی ہے ، اس میں کوئی شک نہیں کہ ایم کیوایم آج بھی ایک کٹھن دور سے گزر رہی ہے لیکن ہر سیاہ رات کی صبح ضرور ہوتی ہے اور اگر ہم قائد کے فکرو فلسفے اور نظریہ پر ثابت قدم رہے تو یقیناًفتح ہمارا مقدر ہوگی . ان خیالات کا اظہار انہوں نے ایم کیوایم لیبر ڈویژن زیراہتمام لال قلعہ گراؤنڈعزیزآباد میں ایم کیوایم لیبر ڈویژن کے ذمہ داران کے اجلاس سے گفتگو کرتے ہوئے کیا۔ اس موقع پر رابطہ کمیٹی کے رکن عبدالحسیب اور مطیع الرحمن کے علاوہ انچارج لیبر ڈویژن اسد کاظمی، جوائنٹ انچارجزانجینئرکاشف خان ، ارشد انصاری اور اراکین بھی موجود تھے ۔ لیبر ڈویژن کے اجلاس سے رکن رابطہ کمیٹی عبدالحسیب نے گفتگو کرتے ہوئے کہا کہ جو کارکنان تحریک کے فکر و فلسفے سے پوری طرح ہم آہنگ ہو جاتے ہیں وہ اپنے قائد کے نظریئے کو لوگوں تک پہنچانے میں اپنا کردار اداکرتے ہیں وہ کسی بھی انقلابی تحریک کا اثاثہ ہوتے ہیں اور اپنے قائد کے نظریئے کو اپنی طاقت بناتے ہوئے غیر معمولی حالات میں اپنے اتحا د و اتفاق سے تحریک کے کام کو آگے بڑھانے میں معاون و مددگار بنتے ہیں آج اگر تحریک پر کڑا وقت ہے تو سازشی عناصر اپنے مذموم عزائم کے ذریعے تحریک کو نقصان پہنچانے کے درپے ہیں تو ہمیں اپنے موثرحکمت عملی کے ذریعے قائد تحریک جناب الطاف حسین اور ایم کیوا یم کے خلاف ہونے والی ہر سازش کو ناکام بنانا ہے ۔ انہوں نے لیبر ڈویژن کے ذمہ داران پر زور دیا کہ وہ اداروں میں اپنے رابطوں کو زیادہ سے زیادہ فعال بنائیں اور دفاتر کے عملے اور مزدوں کو قائد تحریک اور ایم کیوایم کے خلاف ہونے والی سازشوں سے آگاہ کریں کیوں کہ مزدور طبقہ کسی بھی انقلاب میں ہمیشہ کلیدی کردار ادا کرتا ہے ۔ اس موقع پر لیبر ڈویژن کے جوائنٹ انچارج انجینئر کاشف خان نے بھی ذمہ داران سے گفتگو کرتے ہوئے کہا کہ اداروں میں انکی کارکردگی کوبہتر بنائیں اور محنت و لگن کے ساتھ کام کرکے ادارے کی ترقی میں اپنا کردار ادا کریں ۔