آفتاب احمدکی دوران حراست شہادت کاواقعہ ظلم اور بربریت کی بدترین مثال ہے ،ایم کیوایم شعبہ خواتین

کراچی۔۔۔7مئی 2016ء

متحدہ قومی موومنٹ شعبہ خواتین کے اراکین نے ایم کیوایم کے کارکن اورسینئرڈپٹی کنوینرڈاکٹرفاروق ستار کے کوآرڈنیٹر آفتاب احمدکی رینجرزکی حراست میں بہیمانہ تشددکے باعث شہادت کے واقعہ کی شدیدمذمت کی ہے اوراسے کارکنان کے ماورائے عدالت قتل کے واقعات کاتسلسل قراردیاہے۔ اپنے ایک بیان میں شعبہ خواتین نے کہاکہ اس سے قبل بھی ایم کیوایم کے 65سے زائد کارکنوں کواسی طرح گرفتاری کے بعد دوران حراست تشددکانشانہ بناکربے دردی سے شہیدکیاجاچکاہے لیکن آج تک ماورائے عدالت قتل کے کسی ایک بھی واقعہ میں ملوث سرکاری اہلکاروں کے خلاف کوئی کارروائی نہیں کی گئی۔انہوں نے کہاکہ آفتاب احمدکی دوران حراست شہادت کاواقعہ ظلم و بربریت کی بدترین مثال ہے یہی وجہ ہے کہ انسانیت پریقین رکھنے والا ہرفرد آج اس واقعہ کی کھل کرمذمت کررہاہے ۔ انہوں نے تمام سیاسی رہنماؤں،انسانی حقوق کی تنظیموں، وکلاء، قلمکاروں، صحافیوں اورتجزیہ نگاروں سے بھی اپیل کی کہ وہ آفتاب احمدکے ماورائے عدالت قتل کے واقعہ پرآوازاحتجاج بلندکریں۔ انہوں نے کہاکہ آرمی چیف جنرل راحیل شریف کی جانب سے واقعہ کا نوٹس لینا خوش آئند ہے۔ ہمیں راحیل شریف پر مکمل اعتماد ہے اور یقین ہے کہ وہ انصاف کریں گے۔