ایم کیوایم رابطہ کمیٹی کے رکن شبیر احمد قائم خانی نے جنوبی پنجاب کی 20رکن کمیٹی کا اعلان کردیا

ملتان ۔۔۔ یکم؍ مئی 2016ء 

متحدہ قومی موومنٹ کی رابطہ کمیٹی کے رکن شبیر احمد قائم خانی نے تنظیم نو کے سلسلے میں ایم کیوایم 11اضلاع پر مشتمل جنوبی پنجاب کی 20رکنی کمیٹی کا اعلان کردیا ہے ۔ اس کے علاوہ شبیر قائم خانی نے ڈسٹرکٹ ملتان کی اور ڈسٹرکٹ لودھراں کے صدور اور آرگنائزنگ کمیٹی کے ناموں کا بھی اعلان کیا ۔یہ اعلان انہوں نے گزشتہ روز ایم کیوایم ملتان زون میں منعقد ء کئے گئے جنرل ورکرز اجلاس کے شرکاء سے خطاب کرتے ہوئے کیا جس میں ذمہ داران و کارکنان نے بہت بڑی تعداد میں شرکت کی ۔ اس موقع پر ایم کیوایم پنجاب کے صدر و حق پرست سینیٹر میاں عتیق ، صوبائی تنظیمی کمیٹی پنجاب کے رکن ندیم مرزا پنجاب کمیٹی کے جنرل سیکریٹری وسیم کھوکھر اورارا کین بھی موجود تھے ۔ جنرل ورکرز اجلاس سے خطاب کرتے ہوئے شبیر احمد قائم خانی نے کہاکہ ایم کیوایم میں تنظم نو کا عمل جاری رہتا ہے جس کا مقصد تحریکی کام کو مزید موثر اور مستحکم بنانا ہے ۔ انہوں نے کہا کہ قائد تحریک جناب الطاف حسین ملک بھر کی تمام قومیتوں کے حقوق کی عملی جدوجہد کررہے ہیں اور اس جدوجہد میں صوبہ پنجاب کے غریب و مظلوم عوام بڑھ چڑھ کر حصہ لے رہے ہیں اور ایم کیوایم کے خلاف جاری منفی پروپیگنڈوں کے باوجود اب وہ زمینی حقائق کو پرکھ رہے ہیں اور ا س کے مطابق فیصلہ کررہے ہیں اور صوب پنجاب کے غریب و مظلوم عوام نے اس مرتبہ ایم کیوایم اور جناب الطاف حسین کے خلاف تمام منفی پروپیگنڈوں کا مسترد کردیا ہے ۔ انہوں نے کہاکہ ایم کیوایم میں گندے اور خراب لوگ اسٹیبلشمنٹ کی سرپرستی کے باعث اب باہر نکل کر سامنے آرہے ہیں جن کے عمل و کردار اور جرائم سے سب آگاہ ہیں ایسے لوگوں کو ایم کیوایم کی مخالفت میں سامنے لاکر دراصل ملک بھر باالخصوص پنجاب کے غریب ومظلوم عوام کو متنفر کرنے کی کوشش کی گئی لیکن الحمد اللہ اب پنجاب کے غریب ومظلوم عوام میں جناب الطاف حسین کا فکر وفلسفہ اورنظریہ پر نہ صرف مکمل یقین رکھتے ہیں بلکہ منفی پروپیگنڈوں اور الزامات کی سیاست کو سمجھ چکے ہیں ۔ جنرل ورکرز اجلاس سے خطاب کرتے ہوئے ایم کیوایم پنجاب کے صدر و حق پرست سینیٹر میاں عتیق نے کہا کہ ایم کیوایم پر الزامات کی بوچھاڑ کرنے والوں نے ماضی میں بھی اپنے منہ کی کھائی ہے اور اس مرتبہ بھی عوامی سطح پر ذلیل و خوار ہورہے ہیں لیکن اس کے باوجود اپنے اوچھے ہتھکنڈوں اور سازشوں سے ہرگز باز نہیں آرہے ہیں ۔ انہوں نے کہاکہ سندھ سے ایم کیوایم کو ختم کرنے والے جان لیں کہ ایم کیوایم قومی سطح کی جماعت ہے اور ایم کیوایم کے خلاف یکطرفہ کاروائیاں کرکے ایم کیوایم کو ختم ہرگز نہیں کیاجاسکتا ۔ جنرل ورکرز اجلاس سے خطاب کرتے ہوئے پنجاب کے جنرل سیکریٹری وسیم کھوکھر نے کہا کہ قائد تحریک جناب الطاف حسین حق پرستانہ جدوجہد کے باعث ملک بھر کی مظلوم قومیتوں میں اپنا اعلیٰ مقام بنا چکے ہیں اور اس مقام کو کوئی بھی سازش اور جھوٹا پروپیگنڈا اب ختم نہیں کرسکتا ۔ انہوں نے جنوبی پنجاب کے نومنتخب صدر اور کمیٹی کے تمام اراکین کو دلی مبارکباد پیش کی اور انہیں تلقین کی کہ وہ جناب الطا ف حسین کے فکر وفلسفہ اورنظریئے کیلئے اپنا بھر پور کردارادا کریں ۔