حق پرست کارکنان وعوام احتجاجی دھرنے میں زیادہ سے زیادہ تعداد میں شرکت کریں، الطاف حسین

لندن۔۔۔22، اپریل2016ء

متحدہ قومی موومنٹ کے قائد جناب الطاف حسین نے اپیل کی ہے کہ ایم کیوایم کے کارکنان وہمدرد عوام کل برو ز ہفتہ کو کراچی پریس کلب کے باہر ایم کیوایم کے احتجاجی دھرنے میں زیادہ سے زیادہ تعداد میں شرکت کریں ۔ ایک بیان میں جناب الطاف حسین نے کہاکہ گزشتہ کئی برسوں سے ایم کیوایم کو ریاستی طاقت سے کچلنے کی مذموم کوشش کی جارہی ہے ، ایم کیوایم کے بے گناہ رہنماؤں ،ذمہ داروں ، منتخب عوامی نمائندوں اورکارکنوں کو گرفتارکرکے ان پر جھوٹے مقدمات قائم کیے جارہے ہیں ، درجنوں کارکنان کو گرفتارکرکے لاپتہ کردیا گیا ہے اور ایم کیوایم دشمنی میں مظلوم عوام کے بنیادی انسانی حقوق کی سنگین خلاف ورزیاں کی جارہی ہیں ۔ جناب الطاف حسین نے کہاکہ ایم کیوایم کے تحت کل کراچی پریس کلب کے باہر بے گناہ کارکنان کی مسلسل غیرقانونی گرفتاریوں ، حق پرست شہداء کے قاتلوں کی عدم گرفتاری ، ایم کیوایم کے اسیرکارکنان کی رہائی اورلاپتہ کارکنان کی بازیابی کیلئے پرامن جمہوری احتجاجی دھرنا منعقد کیاجارہا ہے ۔ انہوں نے حق پرست ماؤں ، بہنوں ، بزرگوں ، طالب علموں اور نوجوان کارکنان سے اپیل کی کہ وہ احتجاجی دھرنے میں زیادہ سے زیادہ تعداد میں شرکت کریں اور اپنے مثالی اتحاد کا مظاہرہ کرکے ایم کیوایم کو ختم کرنے کی سازش کے خلاف بھرپوراحتجاج کریں۔