اوکاڑہ کے مزارعین کو انکی زمینوں سے بیدخل کرنے کا عمل بند کیا جائے، ان کا جسمانی و معاشی قتل بند کیا جائے۔ الطاف حسین

لندن۔۔۔ 20 اپریل 2016ء

متحدہ قومی موومنٹ کے قائدجناب الطاف حسین نے پنجاب کے شہراوکاڑہ میں قانون نافذ کرنے والے اداروں کی جانب سے مزارعین کوانکی زمینوں سے جبری بیدخل کرنے ،ان پر فائرنگ کرنے اورظلم وزیادتیوں کانشانہ بنانے کی شدیدمذمت کی ہے اور صدرمملکت ممنون حسین، وزیراعظم نوازشریف اورآرمی چیف جنرل راحیل شریف سے مطالبہ کیاہے کہ مزارعین کے ساتھ زیادتیاں بندکرائی جائیں۔ اپنے بیان میں انہوں نے کہاکہ یہ کونساانصاف ہے کہ غریب مزارعین کوان کے حقوق فراہم کرنے کے بجائے فوجی اہلکاروں کی جانب سے ان مزارعین پر گولیاں چلائی جارہی ہیں اورانہیں فوج کی طاقت کے ذریعے ان کی جدی پشتی زمین سے بیدخل کیاجارہاہے ، انہیں پرامن احتجاج کرنے کی بھی اجازت نہیں دی جارہی ہے ، ان کی گرفتاریاں کی جارہی ہیں اوران پر مقدمات بنائے جارہے ہیں۔جناب الطاف حسین نے مطالبہ کیاکہ اوکاڑہ کے ان مزارعین کے ساتھ یہ ظلم بندکیاجائے ،انہیں ان کی زمینوں سے بیدخل کرنے کاعمل بندکیاجائے،ان کاجسمانی ومعاشی قتل بندکیاجائے۔انہوں نے مظلوم مزارعین کے ساتھ مکمل ہمدردی اوریکجہتی کااظہارکیا۔