جنرل راحیل شریف مہاجر کش آپریشن بند کروا کر محب وطن مہاجروں کو دیوار سے لگانے کا عمل بند کروائیں۔ رابطہ کمیٹی

لندن۔۔ 16اپریل2016ء

متحدہ قومی موومنٹ کی رابطہ کمیٹی نے چیف آف آرمی اسٹاف جنرل راحیل شریف سے مطالبہ کیاہے کہ وہ سندھ کے شہری علاقوں میں جاری مہاجر کش آپریشن بند کرواکر محب وطن مہاجروں کو دیوار سے لگانے کا عمل بند کروائیں۔اپنے ایک بیان میں رابطہ کمیٹی نے کہا کہ ایم کیو ایم سندھ کے شہری علاقوں کی واحد منتخب نمائندہ جماعت ہے جسے عوام نے بار بار اپنا متفقہ مینڈیٹ دیا ہے لیکن عوام کی یہ منتخب نمائندہ جماعت رینجرز کے بد ترین مظالم کا نشانہ بنی ہوئی ہے۔ ایم کیو ایم اور اس کے ذیلی شعبہ جات کے بعد اب اس کی طلبہ تنظیم کو بھی بدترین ریاستی جبر کا نشانہ بنایا جارہا ہے اور جھوٹے الزامات لگا کر بے گناہ مہاجروں کی اندھا دھند گرفتاریاں کی جارہی ہیں۔

رابطہ کمیٹی نے کہا کہ ایم کیوا یم تنظیمی کمیٹی کے رکن محمد عظیم کو وفاداری تبدیل نہ کرنے پر گذشتہ ہفتہ گرفتار کیا گیا تھا اور وہ تاحال لاپتہ ہیں۔ ملیر ٹاؤن کے انچارج اور یوسی چیئر مین سید نیر رضا کو رینجرز نے کسی جواز کے بغیر گرفتار کر کے ان کا 90 دن کا ریمانڈ لے لیا ہے جبکہ نیر رضا ایک تعلیم یافتہ، پرامن شہری ہیں اور ماضی میں کسی بھی مقدمہ میں ملوث نہیں رہے ہیں۔رابطہ کمیٹی نے کہا کہ ایک جانب ایم کیو ایم سے وابستہ بے گناہ افراد کو رینجرز کے اہلکار گرفتار کر کے جھوٹے مقدمات میں ملوث کررہے ہیں جبکہ دوسری جانب ایم کیو ایم کی مخالفت کرنے والوں کو سرکاری سرپرستی فراہم کر کے ان کی میڈیا پر تشہیر کی جارہی ہے۔

رابطہ کمیٹی نے کہا کہ رینجرز قومی سلامتی کا ایک ادارہ ہے جسے ایک طبقہ آبادی اور اسکی منتخب نمائندہ جماعت کو کچلنے کے لئے استعمال کیاجارہا ہے۔ یہ گھناؤنا عمل نہ صرف قابل مذمت ہے بلکہ ملکی سلامتی کے حوالے سے انتہائی سنگین اور تشویشناک بھی ہے۔ رابطہ کمیٹی نے جنرل راحیل شریف سے ملک اور قوم کے نام پر اپیل کی کہ وہ رینجرز کو مہاجروں اور ان کی منتخب نمائندہ جماعت کو کچلنے کے لئے استعمال کئے جانے کا سختی سے نوٹس لیں اور جو عناصر بھی اس کے ذمہ دار ہیں ان کے خلاف سخت ایکشن لیں۔