سپریم کورٹ کی جانب سے کراچی سمیت سندھ بھر میں میئر و ڈپٹی میئر کا انتخاب خفیہ بیلٹ کے ذریعے کرانے کے فیصلہ کا ایم کیوایم رابطہ کمیٹی کی طرف سے زبردست خیر مقدم

کراچی ۔۔۔15، اپریل 2016ء 

متحدہ قومی موومنٹ کی رابطہ کمیٹی نے سپریم کورٹ کی جانب سے کراچی سمیت سندھ بھر میں میئر و ڈپٹی میئر کا انتخاب خفیہ بیلٹ کے ذریعے کرانے کے فیصلہ کا زبردست خیر مقدم کیا ہے اور اسے حق و سچ اور تمام مظلوم قومیتوں کی فتح قرار دیا ہے ۔ ایک بیان میں رابطہ کمیٹی نے کہاکہ سپریم کورٹ کے فیصلے کے بعد ثابت ہوگیا ہے کہ سندھ حکومت نے میئر، ڈپٹی میئر ، چیئرمین اور وائس کے انتخاب کیلئے انصاف سے کام نہیں لیا اور الیکشن شیڈول کے اعلان کے بعد الیکشن قانون میں ترامیم کرکے بلدیاتی نظام اور منتخب بلدیاتی نمائندوں کو ان کے اختیارات اور وسائل سے محروم رکھنے کی کوشش کی ہے جو کہ جمہوری حکومت کا سراسر غیر جمہوری اقدام تھا ۔ رابطہ کمیٹی نے میئر ، ڈپٹی میئر ، چیئرمین و وائس چیئرمین کا انتخاب خفیہ بیلٹ کے ذریعے کرانے کے سپریم کورٹ کے حکم پر کراچی ، سندھ سمیت ملک بھر کے میئر ، ڈپٹی میئر ، چیئرمین ، وائس چیئرمین اور کونسلروں کو دلی مبارکباد پیش کی اور کہاکہ سپریم کورٹ کا یہ فیصلہ مظلوموں اور محروموں کی جیت ہے اور جاگیرداروں اور وڈیروں کے ظلم کی چکی میں پسنے والے ایک ایک مظلوم کی فتح ہے ۔ رابطہ کمیٹی نے بیرسٹر فروغ نسیم کو بھی میئر ،ڈپٹی میئر ، چیئرمین و وائس کے انتخاب کا مقدمہ اچھے طریقے سے سپریم کورٹ میں پیش کرنے اور اس دلائل دینے پر زبردست خراج تحسین پیش کیا ۔ رابطہ کمیٹی نے چیف جسٹس انور ظہیر جمالی اور 3رکنی بینچ میں شامل تمام ججوں کو سلام تحسین پیش کیا اور کہا کہ سپریم کورٹ نے حق و سچ پر مبنی فیصلہ دیکر ایک تاریخ رقم کردی ہے ۔