اے پی ایم ایس او کے ذمہ داران اور کارکنان پر جھوٹے مقدمات قائم کرنے کی شدید مذمت کرتے ہیں، ایم کیو ایم رابطہ کمیٹی

کراچی ۔۔۔ 14؍ اپریل 2016ء

متحدہ قومی موومنٹ کی رابطہ کمیٹی نے ایک نومولود اور غیر مقبول سیاسی جماعت کی جانب سے آل پاکستان متحدہ اسٹوڈنٹس آرگنائزیشن کے چیئرمین سرفراز احمد صدیقی اور اے پی ایم ایس او کے دیگر ذمہ داران و کارکنان کو مقدمے میں نامزد کرنے کی سخت الفاظ میں مذمت کی ہے۔ اپنے ایک بیان میں رابطہ کمیٹی نے کہا کہ ابھی تک تو ایم کیو ایم کے ذمہ داران اور کارکنان کو جھوٹے مقدمات میں نامزد کرکے ان کو خوفزدہ کرنے کی کوشش کی جارہی تھی لیکن اب تو اے پی ایم ایس او کے طلبہ پر بھی جھوٹے مقدمات قائم کئے جارہے ہیں۔ انہوں نے کہا کہ طالبعلموں کو جوکہ کسی بھی ملک کے مستقبل کے معمار ہوتے ہیں انہیں دہشتگردی اور اقدام قتل جیسے سنگین مقدمات میں نامزد کرنے سے یہ بات واضح ہوگئی کہ ایم کیو ایم کو دیوار سے لگانے کی ہرممکن کوشش کی جارہی ہے لیکن ایم کیوایم اور اے پی ایم ایس او کے کارکنان ہر قسم کے ظلم و جبر کے باوجود کل بھی قائد تحریک جناب الطاف حسین کے ساتھ تھے اور آج بھی ان کے ساتھ ہیں۔