امجد اللہ خان پرپی ٹی آئی کے رہنماؤں کی جانب سے لگائے جانے والے الزامات کی شدیدمذمتکرتے ہیں ۔ندیم نصرت،کنوینرایم کیوایم

لندن۔۔۔ 7 اپریل 2016ء

متحدہ قومی موومنٹ کی رابطہ کمیٹی کے کنوینر ندیم نصرت نے تحریک انصاف سے ایم کیوایم میں شمولیت اختیارکرنے والے امجد اللہ خان کوزبردست خراج تحسین پیش کیاہے اورپی ٹی آئی کے رہنماؤں کی جانب سے ان پرلگائے جانے والے الزامات کی شدیدمذمت کی ہے ۔ندیم نصرت نے کہاکہ امجداللہ نے حق وسچ کی آواز پرلبیک کہتے ہوئے پی ٹی آئی قیادت کے عوام اورکارکنان دشمن رویہ کوبے نقاب کیاہے اوراپنی رضااورخوشی سے پی ٹی آئی چھوڑ کرایم کیو ایم میں شمولیت اختیار کی ہے تو پی ٹی آئی کے عناصران پر پیسہ لینے کاالزام لگارہے ہیں جوانتہائی شرانگیز اورقابل مذمت ہے ۔ ندیم نصرت نے ان الزامات کی تردید کرتے ہوئے کہاکہ اس قسم کے الزامات کامقصد پی ٹی آئی کی اپنی ناکامی پر پردہ ڈالنا ہے ۔ ندیم نصرت نے کہاکہ قائد تحریک الطاف حسین نے بھی امجداللہ کوایم کیوایم میں شمولیت اور ان کی جرات وہمت پر زبردست خراج تحسین پیش کرتے ہوئے ایم کیوایم میں خوش آمدید کہاہے ۔