حق پرست عوام این اے245اور پی ایس۔115کے ضمنی انتخابات میں بھر پورحصہ لیں۔ الطاف حسین

لندن۔۔ 6اپریل 2016ء

متحدہ قومی موومنٹ کے قائد جناب الطاف حسین نے حلقہ این اے۔245اور پی ایس۔ 115کے عوام ، ماؤں بہنوں ،بزرگوں سے اپیل کی ہے کہ وہ جمعرات کو اپنے حلقوں میں ہونے والے ضمنی انتخابات میں بھر پور طریقہ سے حصہ لے کر حق پرست امیدواروں کو ایک مرتبہ پھر تاریخی کامیابی سے ہمکنار کرائیں ۔ اپنے ایک بیان میں جناب الطاف حسین نے کہا کہ سندھ کے شہری علاقوں میں ہر زبان، قومیت اور مذہب و فرقہ سے تعلق رکھنے والے عوام نے گزشتہ کئی دہائیوں سے ایم کیو ایم کے امیدواروں کو اپنے ووٹوں سے کامیاب کرایا ہے اور این اے۔245 اور پی ایس۔115کے ضمنی انتخابات میں بھی ایم کیو ایم کی تاریخی کامیابی یقینی ہے۔ انہوں نے کہا کہ جن جماعتوں کے امیدواروں کو ایم کیو ایم کے ہاتھوں مسلسل عبرتناک شکست ہوتی رہی ہے وہ نہ صرف افواہیں پھیلارہے ہیں بلکہ پر تشدد حربے بھی استعمال کررہے ہیں لیکن میں عوام سے اپیل کرتا ہوں کہ وہ مکمل طور پر پر امن رہیں ، متحد رہیں اور اپنے ووٹ کی جمہوری طاقت سے تمام سازشوں کو ناکام بنادیں۔ انہوں نے خاص طور پر خواتین ووٹرز سے اپیل کی کہ وہ صبح سویرے جاکر اپنا ووٹ استعمال کریں۔

جناب الطاف حسین نے ایم کیو ایم کے کارکنوں وہمدردوں سے بھی اپیل کی کہ وہ مخالفین کے کسی بھی شرانگیز حربے پر مشتعل نہ ہوں، پرامن رہیں اور الیکشن کو ملتوی کرنے یا متنازعہ بنانے کے لئے کی جانے والی تمام سازشوں کو اپنے اتحاد اور امن سے ناکام بنادیں۔